పాకిస్థాన్ అన్నీ అసత్యాలే చెబుతోందని ఆరోపించారు త్రివిధ దళాధిపతులు. దిల్లీ సంయుక్త మీడియా సమావేశంలో పలు కీలక ప్రకటనలు చేశారు. భారత సైనిక స్థావరాలే లక్ష్యంగా పాక్ వైమానిక దళం దాడులకు దిగిందని వెల్లడించారు.
పాక్ యుద్ధవిమానం ఎఫ్-16ను కూల్చివేశామని, దానికి తగిన ఆధారాలున్నాయని ప్రకటించారు. క్షిపణి శకలాలను మీడియా ముందు బయటపెట్టారు. వింగ్ కమాండర్ను విడుదల చేయాలని పాక్ నిర్ణయించడం సంతోషకరమని వ్యాఖ్యానించారు. జెనీవా ఒప్పందానికి కట్టుబడే పాక్ అలా వ్యవహరించిందని పేర్కొన్నారు.
మీడియా సమావేశంలో మేజర్ జనరల్ సురేంద్ర సింగ్ మహల్, నేవీ రేర్ అడ్మైరల్ డీఎస్ గుజ్రాల్, ఎయిర్వైస్ మార్షల్ ఆర్జీకే. కపూర్ పాల్గొన్నారు.
''భారత సైనిక స్థావరాలే లక్ష్యంగా పాక్ యుద్ధవిమానాలు దాడికి యత్నించాయి. పాకిస్థాన్ యుద్ధ విమానాలు వేసిన బాంబులు ఆర్మీ పరిసర ప్రాంతాల్లో పడ్డాయి. సైనిక స్థావరాల్లో ఎలాంటి నష్టం జరగలేదు.
పాక్కు చెందిన ఎఫ్- 16 ను ఐఏఎఫ్- మిగ్ 21 బైసన్ యుద్ధవిమానంతో కూల్చివేశాం. పాక్ ఆక్రమిత కశ్మీర్లోని నియంత్రణ రేఖ వద్ద ధ్వంసమైంది. ఐఏఎఫ్ ఒక యుద్ధవిమానం మిగ్-21ను కోల్పోయింది. ఒక పైలట్ పాక్ ఆక్రమిత కశ్మీర్లో దిగిపోయారు. ప్రస్తుతం అతను పాక్ అదుపులో ఉన్నారు.
పాక్ ఈ మధ్యలో ఎన్నో అసత్య ప్రకటనలు చేస్తూ వచ్చింది. మొదట భారత్కు చెందిన రెండు యుద్ధవిమానాలు కూల్చి, ముగ్గురు పైలట్లను బంధించామని ప్రకటించింది. అనంతరం మాట మార్చి రెండు విమానాలు, ఇద్దరు పైలట్లు అని తెలిపింది. నిజమేంటంటే భారత్కు చెందిన మిగ్-21 యుద్ధవిమానాలు కూల్చివేసిన ఎఫ్-16 విమానాల్లోనుంచి ప్యారాచూట్ల ద్వారా ఇద్దరు పైలట్లు పాక్ ఆక్రమిత కశ్మీర్లో దిగారని భారత సైన్యం గుర్తించింది. అనంతరం పాక్ సాయంత్రం ఒక్క పైలటే తమ అదుపులో ఉన్నట్లు ప్రకటన సవరించుకుంది.''
- ఎయిర్ వైస్ మార్షల్ ఆర్జీకే. కపూర్
పాకిస్థాన్ రెచ్చగొట్టే చర్యలను సమర్థంగా తిప్పికొట్టడానికి సిద్ధంగా ఉన్నామని ప్రకటించారు మేజర్ జనరల్ సురేంద్ర సింగ్ మహల్. పాక్ పలుమార్లు కాల్పుల విరమణ ఒప్పందాన్ని ఉల్లంఘించిందని గుర్తుచేశారు.
ఉగ్రదాడికి వ్యతిరేకంగా భారత బలగాలు చేసిన దాడికి స్పందనగా పాకిస్థాన్ సైన్యం కాల్పుల విరమణ ఒప్పందం ఉల్లంఘించింది. ఫిబ్రవరి 26న సుందర్బనీ, వింబర్గలి, నౌషేరా, కృష్ణఘాటీ సెక్టార్లలోకి ప్రవేశించింది. దానిని భారత వాయుసేన సమర్థంగా తిప్పికొట్టింది. ఫిబ్రవరి 27న మళ్లీ భారత సైనిక స్థావరాలను పాక్ లక్ష్యంగా చేసుకుంది. ఐఏఎఫ్ అప్రమత్తతతో పాక్ వైమానిక దళ ప్రయత్నాలు విఫలమయ్యాయి. పాక్ రెచ్చగొట్టే చర్యలను తిప్పికొట్టేందుకు సిద్ధంగా ఉన్నాం. సరిహద్దులో శాంతి, సుస్థిరతకై భారత సైన్యం కట్టుబడి ఉంది.
- సురేంద్ర సింగ్ మహల్, మేజర్ జనరల్
