సరిహద్దు రహదారులపై సమీక్షకు పీఏసీ నిర్ణయం

తూర్పు లద్దాఖ్​లో భారత్​, చైనా ఉద్రిక్తతల నేపథ్యంలో పార్లమెంటు పబ్లిక్ అకౌంట్స్ కమిటీ (పీఏసీ) కీలక నిర్ణయం తీసుకుంది. సరిహద్దుల్లో రహదారుల నిర్మాణం, ఎత్తైన ప్రాంతాల్లో సాయుధ దళాలకు అవసరమైన దుస్తుల కొనుగోలుపై సమీక్షించాలని నిర్ణయించినట్లు తెలుస్తోంది.

కాంగ్రెస్ సభాపక్ష నేత అధిర్​ రంజన్​ చౌధురి నేతృత్వంలో శుక్రవారం పార్లమెంటు పబ్లిక్​ అకౌంట్స్ కమిటీ (పీఏసీ) సమావేశం జరిగింది. సరిహద్దు ఉద్రిక్తతలపై చర్చించిన పీఏసీ సభ్యులు.. 2017 కాగ్​ నివేదిక ఆధారంగా పలు కీలక నిర్ణయాలు తీసుకున్నారు.

2017లో కాగ్ 5వ నివేదిక ఆధారంగా భారత్ చైనా సరిహద్దు రహదారులపై ఆడిట్ నిర్వహించేందుకు పీఏసీ నిర్ణయించింది. సియాచిన్, లద్దాఖ్​ వంటి ఎత్తయిన ప్రాంతాల్లో విధులు నిర్వహిస్తున్న సైనికులకు దుస్తులు, పరికరాలు, రేషన్, ఇళ్లు వంటి సౌకర్యాలు కల్పనపై సమీక్ష నిర్వహణకు అంగీకరించింది. ఈ విషయమై రక్షణ శాఖ కార్యదర్శి, ఇతర ఉన్నతాధికారులను వివరణ కోరే అవకాశం ఉంది.

పీఎం కేర్స్​పై..

ఈ భేటీలో చాలా అంశాలు చర్చకు వచ్చాయని తెలుస్తోంది. పీఎం కేర్స్​పై సమీక్ష నిర్వహించాలని అధిర్ ప్రతిపాదించగా.. భాజపా అంగీకరించలేదు. ఈ డబ్బును పార్లమెంటు మంజూరు చేయని కారణంగా దీనిపై విచారించే హక్కు లేదని వాదించారు. భాజపాకు బీజేడీ, జేడీయూ మద్దతునిచ్చాయి.

సాధారణంగా పీఏసీలో 22 మంది సభ్యులు ఉంటారు. 2 సీట్లు ఖాళీగా ఉన్న నేపథ్యంలో 20 మంది మాత్రమే ఉండగా.. భాజపాకు మెజారిటీ ఉంది.

ఇదీ చూడండి:దేశానికి సౌర వెలుగులు.. అతిపెద్ద విద్యుత్​ ప్రాజెక్టు ప్రారంభం