బిహార్​లో ఖాతా తెరిచిన అసదుద్దీన్​ పార్టీ

హైదరాబాద్​ కేంద్రంగా ఉన్న ఎంఐఎం పార్టీ బిహార్​ అసెంబ్లీలో అడుగుపెట్టింది. ఉత్తరభారతంలో తొలిసారి విజయం సాధించింది. తెలంగాణకు మాత్రమే పరిమితమన్న గీతల్ని చెరిపేస్తూ అక్కడి ఉపఎన్నికల్లో కిషన్​గంజ్​ స్థానం నుంచి జయభేరి మోగించింది.

అసదుద్దీన్​ ఓవైసీకి చెందిన ఎంఐఎం పార్టీ బిహార్​ అసెంబ్లీ ఉపఎన్నికల్లో ఖాతా తెరిచింది. అనూహ్యంగా పెద్ద పార్టీలకు షాకిస్తూ కిషన్​గంజ్​ స్థానం నుంచి ఘనవిజయం సాధించింది. భాజపా అభ్యర్ధి స్వీటీ సింగ్​పై ఎంఐఎం అభ్యర్థి కమ్రుల్ హోడా 10 వేల 204 ఓట్ల మెజార్టీతో గెలుపొందారు. ఈ విజయంతో బిహార్​ అసెంబ్లీలో అడుగుపెట్టింది తెలంగాణకు చెందిన పార్టీ.

ఈ ఉపఎన్నికలో స్వతంత్ర అభ్యర్థులతో సహా మొత్తం 8 మంది పోటీ పడ్డారు. ఉత్కంఠగా సాగిన ఓట్ల లెక్కింపులో ఎంఐఎం అభ్యర్థికి మొత్తం 70,469 ఓట్లు రాగా 10,204 ఓట్ల మెజార్టీతో అధికార భాజపా అభ్యర్ధి స్వీటీ సింగ్​ను ఓడించారు. భాజపాకు 60,265 ఓట్లు రాగా, కాంగ్రెస్ పార్టీకి డిపాజిట్​ కూడా దక్కలేదు.

ఇదీ చూడండి:లైవ్​ : మహారాష్ట్ర, హరియాణా ఎన్నికల ఫలితాలు