'వందేభారత్'​ మిషన్​ ద్వారా స్వదేశానికి 2.5 లక్షల మంది

వందే భారత్​ మిషన్​లో భాగంగా ఇప్పటి వరకు 2.5 లక్షల మందికిపైగా స్వదేశానికి తరలించినట్లు విదేశాంగ శాఖ తెలిపింది. మూడో దశ మిషన్​ జులై 2 వరకు కొనసాగుతుందని పేర్కొంది. మొత్తం 4.5 లక్షల మంది దరఖాస్తు చేసుకున్నట్లు వెల్లడించింది.

కరోనా మహమ్మారి కారణంగా విదేశాల్లో చిక్కుకుపోయిన భారతీయులను తీసుకురావడానికి ఏర్పాటు చేసిన వందే భారత్​ మిషన్​ ప్రారంభించిన నాటి నుంచి ఇప్పటి వరకు 2.5 లక్షల మందికిపైగా స్వదేశానికి తీసుకొచ్చినట్లు విదేశాంగ శాఖ తెలిపింది. మొత్తం 4.5 లక్షల మంది స్వదేశానికి వచ్చేందుకు రిజిస్టర్​ చేసుకున్నారని వెల్లడించింది.

" మూడో దశలో 550 విమానాల ద్వారా భారతీయులను స్వదేశానికి తరలించాం. మొత్తం 41 దేశాలకు వందే భారత్​ మిషన్​ సేవలు విస్తరించాం. ఇప్పటి వరకు 2,50,087 మంది భారత్​కు తిరిగి వచ్చారు. వారిలో 21 శాతం మంది వలస కార్మికులు ఉన్నారు. నేపాల్​, భూటాన్​, బంగ్లాదేశ్​ వంటి దేశాల నుంచి సరిహద్దుల గుండా 75వేలకుపైగా వలస కార్మికులు స్వదేశానికి వచ్చారు. చార్టెడ్​ విమానాల ద్వారా 57వేల మందికిపైగా భారత్​కు వచ్చారు."

- అనురాగ్​ శ్రీవాస్తవ, విదేశీ వ్యవహారాల మంత్రిత్వ శాఖ ప్రతినిధి

జులై 2 వరకు మూడో దశ..

మే 7 నుంచి 15 వరకు తొలి దశలో 12 దేశాల నుంచి 15,00 మందిని స్వదేశానికి తీసుకొచ్చినట్లు శ్రీవాస్తవ తెలిపారు. అనంతరం మే 17 నుంచి 22 వరకు రెండో దశ నిర్ణయించారు. తర్వాత జూన్​ 13 వరకు పొడిగించారు. ఈ దశలో 103 విమానాల ద్వారా విదేశాల్లోని భారతీయులను స్వదేశానికి తీసుకువచ్చినట్లు పేర్కొన్నారు. మూడో దశ మిషన్​ జులై 2 వరకు కొనసాగనుంది.

ఇదీ చూడండీ: ఐరాస భద్రతా మండలిలో భారత్ అజెండా ఇదేనా!