వందేభారత్ మిషన్ ద్వారా ఇప్పటివరకు 11.2 లక్షల భారతీయులను స్వదేశానికి చేర్చినట్లు విదేశాంగ శాఖ ప్రకటించింది. కరోనా నేపథ్యంలో విదేశాల్లో చిక్కుకుపోయిన వారిని భారత్కు తీసుకొచ్చేందుకు మే 7న ఈ మిషన్ ప్రారంభించింది కేంద్రం.
వందేభారత్ మిషన్కు సంబంధించి విదేశాంగ శాఖ అధికార ప్రతినిధి అనురాగ్ శ్రీవాస్తవ ఓ ప్రకటన చేశారు.
"వందే భారత్ మిషన్లో భాగంగా వివిధ మార్గాల్లో 2020 ఆగస్టు 19 నాటికి 11.23 లక్షల మందిని భారత్కు చేర్చాం. ప్రస్తుత ఐదో దశలో 22 దేశాల్లో 500 అంతర్జాతీయ, 130 దేశీయ విమానాలు సేవలు అందించాయి. ఆగస్టు చివరి నాటికి మరో 375 విమాన సర్వీసులు నడపనున్నాం."
- అనురాగ్ శ్రీవాస్తవ, విదేశాంగ శాఖ అధికార ప్రతినిధి
ద్వైపాక్షిక ఒప్పందాల ద్వారా..
వందేభారత్ మిషన్లో భాగంగా అమెరికా, కెనడా, బ్రిటన్, ఫ్రాన్స్, జర్మనీ, యూఏఈ, ఖతార్, మాల్దీవులతో ఎయిర్ బబుల్ ఒప్పందం చేసుకుంది భారత్. ఈ ద్వైపాక్షిక ఒప్పందాల సాయంతో నిబంధనల మేరకు రెండు దేశాలకు చెందిన విమానాల్లో భారతీయుల తరలింపును చేపట్టింది. మరో 18 దేశాలతో ఎయిర్ బబుల్ ఒప్పందం కోసం చర్చలు జరుపుతున్నామని పౌరవిమానయాన శాఖ ప్రకటించింది.
ఈ దేశాల్లో ఆస్ట్రేలియా, ఇటలీ, జపాన్, న్యూజిలాండ్, నైజీరియా, బహ్రెయిన్, ఇజ్రాయెల్, కెన్యా, ఫిలిప్పీన్స్, రష్యా, సింగపూర్, దక్షిణకొరియా, థాయ్లాండ్, బంగ్లాదేశ్, అఫ్గానిస్థాన్, భూటాన్, నేపాల్, శ్రీలంక తదితర దేశాలు ఉన్నాయి. ఇది సాధ్యమైతే ఈ దేశాల్లో చిక్కుకున్న వారికి లబ్ధి చేకూరుతుందని శ్రీవాస్తవ తెలిపారు.
ఇదీ చూడండి:కరోనా వేళ సాంక్రామిక వ్యాధుల విజృంభణ
