దేశవ్యాప్తంగా చర్చనీయాంశమైన పౌరసత్వ చట్ట సవరణ బిల్లుపై పలు చోట్ల తీవ్ర వ్యతిరేకత వ్యక్తమవుతోంది. ఈశాన్య రాష్ట్రాల్లో నిరసనలు చెలరేగుతున్నాయి. పలు రాజకీయ పార్టీలూ ఈ బిల్లును తప్పుపడుతున్నాయి. ఈ తరుణంలో దాదాపు 1000 మందికిపైగా శాస్త్రవేత్తలు, విద్యావేత్తలు... కేంద్ర ప్రభుత్వం ఈ బిల్లును ఉపసంహరించుకోవాలని డిమాండ్ చేశారు.
లోక్సభలో సోమవారం బిల్లును ప్రవేశపెట్టకముందు వీరంతా ఓ పిటిషన్పై సంతకం చేశారు. పౌరసత్వ బిల్లును ప్రవేశపెడుతున్నారని తెలుసుకొని.... సంబంధిత పౌరులుగా నిరాశతో ఈ ప్రకటన వెలువరిస్తున్నామని చెప్పారు.
''ప్రస్తుతం రూపొందించిన బిల్లుపై మాకు కచ్చితమైన సమాచారం ఏమీ లేదు. మీడియా నివేదికలు, 2019 జనవరిలో లోక్సభ ఆమోదించిన మునుపటి బిల్లు ఆధారంగా మా ప్రకటన వెలువరించాం. అందరి విశ్వాసాలకు అనుగుణంగా, అందరినీ సమానంగా చూడాలని భారత ప్రాథమిక భావన చెబుతోంది. రాజ్యాంగంలో ఇదే పొందుపరిచారు.
ప్రతిపాదిత బిల్లులో మతాన్ని పౌరసత్వానికి ప్రామాణికంగా ఉపయోగించడం రాజ్యాంగ మౌలిక స్వరూపానికి భిన్నంగా ఉంది. ముస్లింలను మినహాయించడం, భారత భావనకు వ్యతిరేకంగా ఉంది. ప్రస్తుతం మా భయమంతా దీని గురించే.''