ప్రపంచంలో అత్యంత ఎత్తున ఉన్న పోలింగ్​ కేంద్రం ఇదే..

హిమాచల్​ ప్రదేశ్​లోని ఓ పోలింగ్​ కేంద్రం ప్రపంచ రికార్డు సాధించింది. అత్యంత ఎత్తులో ఏర్పాటైన పోలింగ్​ కేంద్రంగా నిలిచింది. అలాగే మరో పోలింగ్​ కేంద్రంలో కేవలం 16 మంది ఓటర్లు మాత్రమే ఉన్నారు. ఈ రెండూ ఒకే లోక్​సభ పరిధిలోనివి కావడం మరో ప్రత్యేకత.

ప్రపంచంలోనే అత్యంత ఎత్తున ఉన్న పోలింగ్​ కేంద్రంగా రికార్డు సృష్టించింది హిమాచల్​ ప్రదేశ్​లోని ఓ పోలింగ్​ కేంద్రం. లాహౌల్​-స్పితి జిల్లాలోని తాషిగంగ్​ గ్రామంలోని పోలింగ్​ కేంద్రం సముద్ర మట్టానికి 15వేల256 అడుగుల ఎత్తులో ఉంది. ఈ కేంద్రంలో 49 మంది నేడు ఓటు హక్కును వినియోగించుకోనున్నారు.

ప్రపంచంలో ఎత్తయినదిగా రాష్ట్రంలోని హిక్కిం పోలింగ్​ కేంద్రం ఉండేదని, కొన్ని సాంకేతిక కారణాల వల్ల ఆ స్థానాన్ని 2017 శాసనసభ ఎన్నికల్లో తాషిగంగ్​ ఆక్రమించిందని రాష్ట్ర అసిస్టెంట్​ ఎన్నికల అధికారి హర్బన్స్​ లాల్​ ధిమన్​ చెప్పారు.

కేంద్రానికి 16 మంది ఓటర్లే

హిమాచల్​లోని కిన్నౌర్​ జిల్లాలోని కా పోలింగ్​ కేంద్రంలో 16 ఓటర్లు మాత్రమే ఉన్నట్టు ధిమన్​ తెలిపారు. తాషిగంగ్​, కా పోలింగ్​ కేంద్రాలు మండి లోక్​సభ పరిధిలో ఉన్నాయి. ఈ స్థానంలో 17 మంది అభ్యర్థులు పోటీ పడుతున్నారు. ప్రధాన పోటీ భాజపా, కాంగ్రెస్​ మధ్యే ఉండనుంది.

సార్వత్రిక ఎన్నికల తుది దశ పోలింగ్నేడు ​ జరగనుంది.

ఇదీ చూడండి : నేడు బదరీనాథ్​​కు ప్రధాని నరేంద్ర మోదీ