సాగు చట్టాల రద్దుకై రాష్ట్రపతికి విపక్షాల వినతి

సాగు చట్టాలను కేంద్రం ఉపసంహరించుకోవాల్సిందేనని తేల్చిచెప్పాయి విపక్షాలు. ఇదే విషయాన్ని రాష్ట్రపతి కోవింద్​తో జరిగిన భేటీలోనూ స్పష్టంగా చెప్పినట్టు వివరించాయి. ఈ మేరకు రాష్ట్రపతికి మెమొరాండం అందించినట్టు వెల్లడించాయి. రైతుల సమస్యలను తీర్చడం కేంద్రం బాధ్యతని గుర్తుచేశాయి.

రైతుల ఆందోళనలు ఉద్ధృతంగా సాగుతున్న తరుణంలో విపక్షాలు రాష్ట్రపతి రామ్​నాథ్​ కోవింద్​తో భేటీ అయ్యాయి. రైతులకు వ్యతిరేకంగా ఉన్న నూతన వ్యవసాయ చట్టాలను వెనక్కి తీసుకోవాలని అభ్యర్థించాయి.

కాంగ్రెస్​ సీనియర్​ నేత రాహుల్​ గాంధీ, ఎన్​సీపీ అధినేత శరద్​ పవార్​, సీపీఐఎమ్​ ప్రధాన కార్యదర్శి సీతారామ్​ ఏచూరి, సీపీఐ ప్రధాన కార్యదర్శి డీ రాజా, డీఎమ్​కే నేత టీకేఎస్​ ఇళంగోవన్​తో కూడిన బృందం రాష్ట్రపతి భవన్​లో రాష్ట్రపతిని కలిసింది. చట్టాలపై నిరసన తెలుపుతూ మెమొరాండం అందించింది.

రాష్ట్రపతికి మెమొరాండం అందజేస్తున్న విపక్ష నేతలు

"నూతన వ్యవసాయ చట్టాలను ఎలాంటి చర్చలు లేకుండా, ఓటింగ్​ జరగకుండా, అప్రజాస్వామికంగా పార్లమెంట్​లో ఆమోదించారు. ఈ చట్టాలు భారత ఆహార భద్రతను ప్రమాదంలోకి నెట్టేలా ఉన్నాయి. ఇవి భారత వ్యవసాయ రంగం, రైతులను నాశనం చేసే విధంగా ఉన్నాయి. కనీస మద్దతు ధరను రద్దు చేసేందుకు ఈ చట్టాలు పునాదులు వేస్తున్నాయి. వీటిని కేంద్రం వెంటనే ఉపసంహరించుకోవాలి."

--- విపక్షాలు

ఇదీ చూడండి:-'సాగు చట్టాలపై విపక్షాల రాజకీయం నిలవదు'

సమావేశం అనంతరం మీడియాతో మాట్లాడారు రాహుల్​ గాంధీ. వ్యవసాయ చట్టాలను వెనక్కి తీసుకోవడం ఎంతో అవసరమని రాష్ట్రపతికి వివరించినట్టు పేర్కొన్నారు.

అప్రజస్వామికంగా ఈ చట్టాలను ఆమోదించిన ప్రభుత్వం.. ఎందరో రైతుల జీవితాలను ప్రమాదంలో పెట్టిందని ఆరోపించారు సీపీఎమ్​ నేత సీతారామ్​ ఏచూరి. అందువల్ల వ్యవసాయ చట్టాలతో పాటు విద్యుత్​ సవరణ బిల్లును కూడా వెనక్కి తీసుకోవాలని డిమాండ్​ చేశారు.

ఇంతటి చలిలోనూ రైతులు నిర్విరామంగా ఆందోళనలు చేస్తున్నట్టు ఎన్​సీపీ నేత శరద్​ పవార్​ పేర్కొన్నారు. వారి సమస్యలను తీర్చడం ప్రభుత్వ బాధ్యత అని గుర్తుచేశారు.

ఇదీ చూడండి:-ఆ పథకానికి కేంద్రం ఆమోదం- లక్షలాది మందికి లబ్ధి