'చమురు ధరలు పెంచితే సామాన్యుడి పరిస్థితి ఏంటి?'

లోక్​సభలో బడ్జెట్​పై చర్చ సందర్భంగా పెట్రోల్​, డీజిల్​పై సుంకాల పెంపును తీవ్రంగా విమర్శించాయి విపక్షాలు. అది సగటు మనిషికి పెను భారంగా మారుతుందని పేర్కొన్నాయి. తక్షణమే సుంకాల పెంపు ఉపసంహరించుకోవాలని కాంగ్రెస్​ నేత శశి థరూర్​ డిమాండ్​ చేశారు.

పెట్రోల్​, డీజిల్​ ధరలు పెంచిన కేంద్ర ప్రభుత్వంపై విపక్షాలు మండిపడ్డాయి. 2019-20 వార్షిక బడ్జెట్​పై లోక్​సభలో చర్చ సందర్భంగా ధరల పెంపును తీవ్రంగా తప్పుపట్టాయి. సుంకాల పెంపు సామాన్య మానవునిపై పెను భారంగా మారుతుందని పేర్కొన్నాయి. తక్షణమే సుంకాల పెంపును ఉపసంహరించుకోవాలని డిమాండ్​ చేశాయి.

అంతర్జాతీయంగా ముడి చమురు ధరలు తగ్గుతున్నప్పటికీ... దేశంలో పెట్రోల్​, డీజిల్​పై సుంకాలు ఎందుకు పెంచారని ప్రభుత్వాన్ని ప్రశ్నించారు కాంగ్రెస్​ సీనియర్​ నేత శశి థరూర్​.

"ఈ ప్రభుత్వం విధించిన పన్నుల వల్ల సామాన్య ప్రజలు ఇప్పటికే ప్రపంచంలోనే అత్యధిక చమురు ధరలు చెల్లిస్తున్నారు. ప్రపంచవ్యాప్తంగా పెట్రోల్​, డీజిల్​ ధరలు తగ్గుతున్నప్పటికీ... మన ఆర్థిక మంత్రి లీటర్​ పెట్రోల్​, డీజిల్​పై మరో 2 రూపాయల భారాన్ని మోపారు."

- శశి థరూర్​, కాంగ్రెస్​ నేత.

జీఎస్టీ పరిధిలోకి తీసుకురావాలి...

పెట్రోల్​, డీజిల్​ ధరల పెరుగుదలతో ప్రజలు ఇబ్బందులు పడాల్సిన పరిస్థితి నెలకొందన్నారు డీఎంకే నేత టీఆర్​ బాలు. వెంటనే సుంకాల పెంపును ఉపసంహరించుకోవాలని డిమాండ్​ చేశారు. పెట్రోల్​, డీజిల్​ల​ను వస్తు సేవల పన్ను (జీఎస్టీ) పరిధిలోకి తీసుకురావాలన్నారు.

మోదీ 2.0 ప్రభుత్వంలో తొలి బడ్జెట్​ ప్రవేశపెట్టిన ఆర్థిక మంత్రి నిర్మలాసీతారామన్...​ పెట్రోలు, డీజిల్‌పై ఎక్సైజ్ సుంకం, రోడ్లు- మౌలిక వసతుల సుంకాన్ని లీటర్‌కు రూ.2 అదనంగా పెంచారు. ఈ నిర్ణయంతో పెట్రోల్​ ధర దాదాపు లీటర్​కు రూ.2.40, డీజిల్​ లీటర్​కు రూ.2.36 మేర పెరిగింది.

ఇదీ చూడండి:మసీదుల్లో మహిళల ప్రవేశంపై వ్యాజ్యం కొట్టివేత