'విపక్షాలు ఒక్కటైతే .. భాజపా చిత్తుచిత్తే'

ఝార్ఖండ్​ ఎన్నికల ఫలితాల్లో జేఎంఎం-కాంగ్రెస్​ కూటమి విజయం సాధించిన నేపథ్యంలో పలువురు నేతలు కీలక వ్యాఖ్యలు చేశారు. పౌర చట్టం, ఎన్​ఆర్​సీకి వ్యతిరేకంగా ఇచ్చిన తీర్పుగా అభివర్ణించారు దిల్లీ ముఖ్యమంత్రి అరవింద్​ కేజ్రీవాల్​. భాజపాను కాదని తమ ఆకాంక్షలను హేమంత్​ సోరెన్​ నెరవేరుస్తారని ప్రజలు నమ్మారని పేర్కొన్నారు బంగాల్​ ముఖ్యమంత్రి మమత. భారతీయ జనతా పార్టీ అజేయమైందేమి కాదని.. విపక్షాలు ఏకతాటిపైకి వస్తే ఓడించటం సులభమేనని స్పష్టం చేశారు కేంద్ర మాజీ మంత్రి పి.చిదంబరం.

ఝార్ఖండ్​ అసెంబ్లీ ఎన్నికల్లో అధికార భాజపా ఘోర పరాజయం పాలైంది. జేఎంఎం నేతృత్వంలోని కూటమి అత్యధిక సీట్లు సాధించి ప్రభుత్వం ఏర్పాటు చేయనుంది. ఈ నేపథ్యంలో ఝార్ఖండ్​ ఎన్నికలతో భాజపాకు ప్రజలు సరైన సమాధానమిచ్చారని పేర్కొన్నారు పలువురు నేతలు.

హేమంత్​పైనే ప్రజల నమ్మకం..

పౌరసత్వ చట్టం, జాతీయ పౌర పట్టిక (ఎన్​ఆర్​సీ)కి వ్యతిరేకంగా ఆందోళనలు జరుగుతున్న నేపథ్యంలో వచ్చిన ఎన్నికల్లో.. తమ ఆకాంక్షలను హేమంత్​ సోరెన్​ నేరవేరుస్తారని ప్రజలు నమ్మారని పేర్కొన్నారు పశ్చిమ్​ బంగ ముఖ్యమంత్రి మమతా బెనర్జీ. జేఎంఎం-కాంగ్రెస్​-ఆర్​జేడీ కూటమి గెలుపునకు పాటుపడిన వారికి, హేమంత్​ సోరెన్​కు అభినందనలు తెలిపుతూ ట్వీట్​ చేశారు దీదీ.

ఎన్​ఆర్​సీ, సీఏఏకు వ్యతిరేక తీర్పు..

ఝార్ఖండ్​ అసెంబ్లీ ఎన్నికల ఫలితాలు.. పౌరసత్వ చట్టం, ఎన్​ఆర్​సీకి వ్యతిరేకంగా ఇచ్చిన తీర్పుగా పేర్కొన్నారు దిల్లీ ముఖ్యమంత్రి అరవింద్​ కేజ్రీవాల్​. సీఏఏ, ఎన్​ఆర్​సీలకు అనుకూలంగా భాజపా శ్రేణులు విస్తృతంగా ప్రచారం చేసినా ఓటర్లు వాటిని ఆమోదించలేదన్నారు. ఝార్ఖండ్​లో సరైన పాలన అందించకపోవటంతోనే ఓటమి పాలైదని విమర్శించారు.

భాజపా అజేయమైందేమి కాదు..

భాజపా అజేయమైందేమి కాదని.. కాషాయపార్టీని ఓడించడానికి విపక్షాలన్నీ కలిసిరావాలని కాంగ్రెస్​ నేత, కేంద్ర మాజీ మంత్రి చిదంబరం పిలుపునిచ్చారు. భవిష్యత్తు ఎన్నికల్లోనూ.. కాషాయపార్టీ ఓటమి తప్పదని జోస్యం చెప్పారు. ఝార్ఖండ్​ ఫలితాలపై కాంగ్రెస్​ పార్టీ సంతోషంగా ఉందని పేర్కొన్నారు. జేఎంఎం-కాంగ్రెస్​ కూటమికి అఖండ విజయం అందించిన ఝార్ఖండ్​ ప్రజలకు కృతజ్ఞతలు తెలిపారు.

ఇదీ చూడండి:ఝార్ఖండ్‌ అసెంబ్లీ ఎన్నికల్లో జేఎంఎం కూటమి జయభేరి