ఎన్నికల ఫలితాలకు ముందు 22 పార్టీలు కేంద్ర ఎన్నికల సంఘాన్ని కలిశాయి. ఓట్ల లెక్కింపు విషయమై సుప్రీం కోర్టు సూచించిన విధంగా నడుచుకోవాలని ఈసీని కోరుతూ నివేదిక అందించాయి. ప్రతి అసెంబ్లీ నియోజకవర్గం పరిధిలోని 5 వీవీప్యాట్ల స్లిప్పులను.. చివరి దశ కౌంటింగ్ తర్వాత లెక్కించాలని ఈసీ చూస్తోందని విపక్షాలు మండిపడ్డాయి.
ఈవీఎంల రవాణాపైనా విపక్షాలు ఆందోళన వ్యక్తం చేశాయి. స్ట్రాంగ్రూంల భద్రతపైనా నిఘా ఉంచాలని ఈసీకి నివేదించారు నేతలు. ఎన్నికల లెక్కింపును పారదర్శకంగా నిర్వహించాలని కోరాయి. విపక్షాలు లేవనెత్తిన అంశాలపై ఈసీ రేపు చర్చిస్తామని తెలిపినట్లు కాంగ్రెస్ సీనియర్ నేత అభిషేక్ సింఘ్వీ వెల్లడించారు.
''మేం ఈ రోజు రెండు, మూడు ప్రధాన సమస్యల్ని ఈసీ దృష్టికి తీసుకెళ్లాం. ప్రతి శాసనసభ నియోజకవర్గంలో 5 వీవీప్యాట్ల స్లిప్పులను యాదృచ్ఛికంగా లెక్కించాలని సుప్రీంకోర్టు సూచించింది. ఇప్పుడు ఎన్నికల సంఘం దీనిపై అభ్యంతరం వ్యక్తం చేసింది. ఈవీఎం మెషీన్లలో ఓట్ల లెక్కింపు పూర్తయిన తర్వాత వీవీప్యాట్ స్లిప్పులను లెక్కించాలని చూస్తోంది. అందుకు మేం సుముఖంగా లేం. ప్రతి అసెంబ్లీ స్థానంలోని 5 వీవీప్యాట్ స్లిప్పులనే మొదటగా గణించాలి. అందులో ఏమైనా వ్యత్యాసం ఉంటే.. శాసనసభ పరిధిలోని మొత్తం వీవీప్యాట్ స్లిప్పులను లెక్కించాలి. ఈవీఎం యంత్రాల్లో ఒక పార్టీ గుర్తుపై బటన్ నొక్కితే వేరే పార్టీకి అంటే.. భారతీయ జనతా పార్టీకి వెళ్లింది. ''