వందేభారత్ ​: నేటి నుంచి 'ఆపరేషన్​ సముద్రసేతు'

శుక్రవారం మాలే తీరాన్ని చేరిన ఐఎన్​ఎస్ జలాశ్వ, ఐఎన్​ఎస్ మగర్​ల ద్వారా మాల్దీవుల్లోని ప్రవాసీలు నేడు భారత్​కు బయల్దేరనున్నారు. కేరళలోని కొచ్చి తీరానికి వారు చేరుకుంటారు. రెండు నౌకల్లో 1000మంది భారతీయులు స్వదేశానికి రానున్నారని సమచారం.

విదేశాల్లో చిక్కుకున్న భారతీయులను స్వదేశానికి తీసుకొచ్చేందుకు వందేభారత్​ కార్యక్రమాన్ని చేపట్టింది కేంద్రం. ఇందులో భాగంగా ఇప్పటికే విమానాల​ ద్వారా పలువురిని స్వదేశానికి చేర్చింది. ఆపరేషన్​ సముద్రసేతు కింద సముద్ర మార్గం ద్వారా మరికొంత మందిని తీసుకొచ్చేందుకు సిద్ధమైంది. ఈ కార్యక్రమం ఇవాళ్టి నుంచి ప్రారంభం కానుంది.

ఆపరేషన్​ సముద్రసేతు తొలి విడతలో భాగంగా మాల్దీవుల్లోని భారతీయులు నేడు స్వదేశానికి రానున్నారు. నౌకాదళానికి చెందిన యుద్ధనౌకలు ఐఎన్ఎస్​ జలాశ్వ, ఐఎన్‌ఎస్​ మగర్‌ నేడు మాల్దీవుల్లోని భారతీయులతో కేరళ కొచ్చి తీరానికి చేరనున్నాయి. ఆ దేశంలోని మాలే నౌకాశ్రయం నుంచి రెండు యుద్ధ నౌకల్లో మొత్తం వెయ్యి మంది వెనక్కి రానున్నారు.

మాల్దీవుల్లోని భారత రాయబార కార్యాలయ అధికారులు వెనక్కి రావాలనుకునే వారి నుంచి దరఖాస్తులు స్వీకరించారు. అనంతరం వారికి వైద్య పరీక్షలు చేశారు. కరోనా లక్షణాలు లేని వారిని మాత్రమే దేశంలోకి వచ్చేందుకు అనుమతించారు.

ఇదీ చూడండి:'కరోనా చికిత్సకు గంగా జలమా? ఆధారాలేవి?'