ఓనమ్​ వేడుకల్లో అలనాటి 'కుమ్మత్తికాళి' కళకళలు

కేరళ వ్యాప్తంగా ఓనమ్​ సంబరాలు అంబరాన్నంటుతున్నాయి. ఈ నెల ఒకటిన మొదలైన ఉత్సవాలు.. 13వ తేదీ వరకు కొనసాగనున్నాయి. ఓనమ్​లో భాగంగా త్రిస్సూర్​ జిల్లాలో పురాతన నృత్యమైన 'కుమ్మత్తికాళి' స్థానికులను విశేషంగా అకట్టుకుంటోంది.

కేరళలో శతాబ్దాల కాలం నాటి కళలు, నృత్యాలు ఇప్పటికీ దర్శనమిస్తుంటాయి. వీటిలో అనాదిగా వస్తున్న పూరమ్​, పులికాళి తరహాలోనే 'కుమ్మత్తికాళి' నృత్యం త్రిస్సూర్​ జిల్లాలో నేటికీ కనిపిస్తోంది.

'ఓనమ్'​ పండుగలో భాగంగా దాదాపు 60 కుమ్మత్తికాళి నృత్య బృందాలు చేసే నాట్యం అంటే ఇక్కడి ప్రజలకు ఎంతో ఇష్టం. నృత్యకారులు.. కృష్ణ, నారద, శివుడు, కాళీ, గణపతి, హనుమాన్​ సహా వివిధ పౌరాణిక వేషధారణల్లో ఇంటింటికీ వెళ్లి నృత్యం చేస్తారు. అనంతరం స్థానికులు అందించే కానుకలు స్వీకరిస్తారు.

త్రిస్సూర్​లో వ్యవసాయ పరికరమైన 'కుమ్మత్తికాళి' అనే కర్రను పట్టుకుని కళాకారులు నాట్యం​ చేస్తారు. అందుకే ఈ నృత్యానికి 'కుమ్మత్తికాళి' అనే పేరు వచ్చింది. ముఖాలకు చెక్కతో తయారు చేసిన ముసుగులను ధరిస్తారు. స్థానిక 'కుమ్మత్తి పుల్ల' గడ్డితో తయారు చేసిన వస్త్రాలు వేసుకుంటారు. చుట్టూ డప్పు వాద్యాలతో వచ్చే సంగీతంతో నృత్యకారులు వేసే చిందులు స్థానికులను ఎంతో ఉత్సాహపరుస్తాయి.