పౌరసత్వ సవరణ బిల్లుపై విమర్శలు వస్తున్న నేపథ్యంలో కేంద్ర ప్రభుత్వం వాటికి అంశాల వారీగా సమాధానాలు ఇచ్చేందుకు ప్రయత్నించింది. పాకిస్థాన్‌, అఫ్గానిస్థాన్‌, బంగ్లాదేశ్‌ల్లోని ఆరు మైనారిటీ వర్గాలకు చెందిన వారిని గుర్తించేందుకు ఉద్దేశించిన చట్టం ఇదని.. వారు ఆయా దేశాల్లో మతపర హింసకు గురై వలస వచ్చిన విషయాన్ని గమనంలో ఉంచుకొని అత్యంత మానవత్వంతో రూపొందించిన బిల్లు అని చెప్పింది.
అపోహ 1:ఈ బిల్లు బెంగాలీ హిందువులకు పౌరసత్వం కల్పిస్తుంది.
వాస్తవం: ఈ బిల్లు ద్వారా బెంగాలీ హిందువులకు దానంతట అదే భారత పౌరసత్వం లభించదు. పాకిస్థాన్‌, అఫ్గానిస్థాన్‌, బంగ్లాదేశ్‌ల్లోని ఆరు మైనారిటీ వర్గాలకు చెందిన వారిని గుర్తించేందుకు ఉద్దేశించిన చట్టం ఇది. వారు ఆయా దేశాల్లో మతపరంగా హింసకు గురై వలస వచ్చిన విషయాన్ని గమనంలో ఉంచుకొని అత్యంత మానవత్వంతో రూపొందించిన బిల్లు ఇది.
అపోహ 2: అసోం ఒప్పందాన్ని నీరుకారుస్తుంది.
వాస్తవం: ఎట్టి పరిస్థితుల్లోనూ అసోం ఒప్పందాన్ని పౌరసత్వ సవరణ బిల్లు నీరుకార్చదు. అక్రమంగా వలసవచ్చిన వారిని గుర్తించేందుకు/వెనక్కు పంపేందుకు 1971 మార్చి 24ని కటాఫ్‌ తేదీగా గుర్తిస్తారు.
అపోహ 3: ఈ బిల్లు స్థానిక అసోం ప్రజల ప్రయోజనాలకు వ్యతిరేకం.
వాస్తవం: ఇది కేవలం అసోం రాష్ట్రం కోసం రూపొందించిన బిల్లు కాదు. దేశం మొత్తానికీ వర్తిస్తుంది. అక్రమ వలసదారుల నుంచి స్థానిక తెగలను రక్షించేందుకు రూపొందించిన జాతీయ పౌరపట్టికకు ఇది వ్యతిరేకం కాదు.
అపోహ4:బెంగాలీ భాష మాట్లాడేవారి ఆధిపత్యం పెరుగుతుంది.
వాస్తవం: హిందూ బెంగాలీ జనాభాలో అత్యధికులు అసోంలోని బరాక్‌ లోయలో స్థిరపడ్డారు. ఇక్కడ బెంగాలీ రెండో భాషగా ఉంది. బ్రహ్మపుత్ర లోయలో హిందూ బెంగాలీలు అక్కడక్కడ స్థిరపడ్డారు. వారు అస్సామీ భాషనే తమ భాషగా ఎంచుకున్నారు.