భర్త వైద్యం కోసం.. కొడుకునే తాకట్టు పెట్టిన తల్లి

భర్త వైద్య ఖర్చుల కోసం కన్న కొడుకునే వదులుకునేందుకు సిద్ధమైందో మహిళ. కష్టమైనా తన భర్త కోసం తప్పదనుకుని ముందడుగు వేసింది. ఒడిశాలోని గంజాం జిల్లా భంజ్​నగర్​ పరిధి బలిపట్నానికి చెందిన ఒక మహిళ తీసుకున్న ఈ నిర్ణయం నిరుపేదల దుస్థితిని కళ్లకు కడుతోంది.

తన భర్త వైద్య చికిత్స ఖర్చుల కోసం కన్నకొడుకును తాకట్టు పెట్టిన దయనీయ ఘటన ఒడిశాలోని గంజాం జిల్లా పరిధి భంజ్​నగర్​లో జరిగింది. 5 నెలల కుమారుడిని సొంత అక్కకు రూ .10,000కు తనఖా పెట్టిన ఘటన ఆలస్యంగా వెలుగులోకి వచ్చింది.

తలకిందులైన బతుకు..

జిలీ నాయక్ భర్త దుఖా నాయక్ మూడు నెలల క్రితం రోడ్డు ప్రమాదానికి గురయ్యాడు. అప్పటినుంచి ఇంటికే పరిమితమయ్యాడు. సరైన చికిత్స లేక ఆ గాయం తీవ్రత ఎక్కువైంది. అతని ఆరోగ్యం మరింత క్షీణించింది. ఈ నేపథ్యంలోనే తన బాబును తాకట్టు పెట్టవలసి వచ్చిందని వివరించింది జిలీ.

కాలి గాయం ఎంతకూ మానట్లేదని.. మెరుగైన చికిత్స కోసం డబ్బు లేక తప్పనిసరి పరిస్థితుల్లో ఇలా చేయాల్సి వచ్చిందని దుఖా నాయక్ వాపోయాడు.

ఇదీ చదవండి:పురిటి నొప్పులతోనే నదిని దాటి​ ప్రసవం!