సీనియర్ న్యాయవాది రామ్‌ జెఠ్మలానీ కన్నుమూత

సుప్రీంకోర్టు సీనియర్ న్యాయవాది రామ్​ జెఠ్మలానీ తుదిశ్వాస విడిచారు. గత కొద్ది నెలలుగా అనారోగ్యంతో బాధపడుతున్న ఆయన 95 ఏళ్ల వయస్సులో వృద్ధాప్యం కారణంగా మృతి చెందినట్లు కుటుంబ సభ్యులు ప్రకటించారు. సాయంత్రం అంత్యక్రియలు నిర్వహిస్తామని తెలిపారు.

సుప్రీంకోర్టు సీనియర్ న్యాయవాది, రామ్ జెఠ్మలానీ కన్నుమూశారు. దిల్లీలోని స్వగృహంలో ఉదయం 7.45 గంటలకు తుదిశ్వాస విడిచినట్లు కుటుంబసభ్యులు ప్రకటించారు. 95 ఏళ్ల వయసున్న జెఠ్మలానీ గత కొద్ది నెలలుగా అనారోగ్యంతో బాధపడుతున్నారని ఆయన కుమారుడు మహేశ్ జెఠ్మలానీ వెల్లడించారు.

రాష్ట్రపతి సంతాపం...

రామ్ జెఠ్మలానీ మృతి పట్ల తీవ్ర విచారం వ్యక్తం చేశారు రాష్ట్రపతి రామ్​నాథ్​ కోవింద్. ప్రజల సమస్యలపై పోరాటంలో తన గళాన్ని సమర్థంగా వినిపించే వారని పేర్కొన్నారు. దేశం మంచి మేధావిని కోల్పోయిందని తెలిపారు.

జెఠ్మలానీ మృతి పట్ల మోదీ దిగ్భ్రాంతి

సీనియర్ లాయర్ రామ్​ జెఠ్మలానీ మృతి పట్ల తీవ్ర దిగ్భ్రాంతి వ్యక్తం చేశారు ప్రధాని మోదీ. దేశం ఒక న్యాయకోవిదుడిని కోల్పోయిందని ట్విట్టర్​ వేదికగా పేర్కొన్నారు. న్యాయస్థానాలు, పార్లమెంట్​కు ఎనలేని సేవలు చేశారని కొనియాడారు. ఎమర్జెన్సీ సమయంలో ప్రజల హక్కుల కోసం చేసిన పోరాటం చిరస్థాయిగా నిలిచిపోతుందన్నారు.

సహచరుడిని కోల్పోయా: వెంకయ్య

మంత్రులుగా, పార్లమెంట్ సహచరులుగా అనేక సార్లు కలిసి పనిచేశామని గుర్తు చేసుకున్నారు ఉపరాష్ట్రపతి వెంకయ్య నాయుడు. జెఠల్మానీ మృతితో మంచి సన్నిహితుడిని కోల్పోయానని ఆవేదన వ్యక్తంచేశారు. జెఠ్మలానీ పార్థివ దేహానికి నివాళులు అర్పించారు.

అమిత్​షా నివాళి...

రామ్ జెఠ్మలానీ మృతి పట్ల కేంద్ర హోంమంత్రి, భాజపా అధ్యక్షుడు అమిత్​షా దిగ్భ్రాంతి వ్యక్తం చేశారు. పార్థివ దేహాన్ని సందర్శించి నివాళులు అర్పించారు. ఒక సీనియర్ న్యాయవాదిని మాత్రమే కోల్పోలేదని, మానవత్వమున్న మంచి మనిషిని కోల్పోయామని పేర్కొన్నారు.

ఇదీ చూడండి: అండర్​ వరల్డ్​ డాన్​లు,​ అగ్రనేతలు జెఠ్మలానీ క్లయింట్లే!