'దేశవ్యాప్తంగా ఒకే పాఠ్యప్రణాళిక అమలు అసాధ్యం'

దేశవ్యాప్తంగా ఒకే పాఠ్యప్రణాళిక అమలు సాధ్యం కాదని కేంద్ర మానవవనరుల అభివృద్ధి శాఖ మంత్రి రమేశ్‌ పోఖ్రియాల్‌ స్పష్టం చేశారు. పాఠ్యాంశాల రూపకల్పనకు జాతీయ పాఠ్యప్రణాళిక ఫ్రేమ్‌వర్క్‌ ఏర్పాటు చేస్తున్నట్లు తెలిపారు. అంతరించిపోతున్న భాషల సంరక్షణకు విశ్వవిద్యాలయాల్లో నూతన పథకం రూపొందిస్తున్నట్లు వెల్లడించారు.

దేశవ్యాప్తంగా ఒకే విధమైన పాఠ్యప్రణాళిక అమలు సాధ్యం కాదని కేంద్ర మానవవనరుల అభివృద్ధి శాఖ మంత్రి రమేశ్‌ పోఖ్రియాల్‌ తెలిపారు. పాఠ్యాంశాల రూపకల్పనలో మార్గనిర్దేశం చేయడానికి జాతీయ విద్యా పరిశోధన, శిక్షణా మండిలి(ఎన్​సీఈఆర్​టీ)..జాతీయ పాఠ్యప్రణాళిక ఫ్రేమ్‌వర్క్‌ను ఏర్పాటు చేసినట్లు తెలిపారు.

రాజ్యాంగంలో విద్య ఉమ్మడి జాబితాలో ఉందని గుర్తుచేసిన మంత్రి... పాఠ్యప్రణాళికలో రాష్ట్రాలు, కేంద్ర పాలిత ప్రాంతాలు కూడా నిర్ణయం తీసుకోవచ్చని స్పష్టం చేశారు. రాష్ట్రాలు... విద్యా పరిశోధన, శిక్షణా మండళ్ల(ఎన్​సీఈఆర్​టీ) విధానాన్ని అనుసరించవచ్చని తెలిపారు. లేదంటే జాతీయ పాఠ్యప్రణాళిక ఫ్రేమ్‌వర్క్‌ ఆధారంగా సొంత పాఠ్యాంశాలను రూపొందించుకోవచ్చని స్పష్టం చేశారు.

అంతరించిపోతున్న భాషలకోసం పథకం

మరోవైపు అంతరించిపోతున్న భాషలను సంరక్షించడానికి కేంద్ర, రాష్ట్ర విశ్వవిద్యాలయాల్లో ఒక పథకం ప్రవేశపెట్టినట్లు పోఖ్రియాల్‌ తెలిపారు. అందుకోసం విశ్వవిద్యాలయాలను స్థానిక భాషల ఆధారంగా పలు గ్రూపులుగా విభజించినట్లు వివరించారు.