భాజపాతో పోల్చితే శివసేన నయం: శరద్ పవార్​

శివసేనతో కూటమిగా జట్టుకట్టడం భాజపాతో కలిసినంత క్లిష్టతరం కాదని వ్యాఖ్యానించారు ఎన్సీపీ అధినేత శరద్​పవార్​. కాంగ్రెస్​తో చర్చలు సాగిన తీరు పట్ల అసంతృప్తితోనే అజిత్​ పవార్ తొలుత​ భాజపాకు మద్దతిచ్చారని.. ఆ తర్వాత విరమించుకున్నారని తెలిపారు.

మహారాష్ట్రలో శివసేన కూటమి ప్రభుత్వ ఏర్పాటులో కీలక భూమిక పోషించిన ఎన్సీపీ అధినేత శరద్​ పవార్​ మరో ఆసక్తికర విషయం తెలిపారు. అజిత్​ పవార్​తో దేవేంద్ర ఫడణవీస్ సంప్రదింపులు జరిపిన విషయం తనకు తెలుసని వెల్లడించారు. కాంగ్రెస్​తో చర్చలు సాగిన తీరు పట్ల అసంతృప్తితోనే తొలుత భాజపాతో ప్రభుత్వ ఏర్పాటుకు అజిత్ మద్దతిచ్చారని శరద్ పవార్ చెప్పారు.

భాజపాతో జట్టుకట్టడం కంటే శివసేనతో కూటమిగా ఏర్పడటమే మేలని వ్యాఖ్యానించారు పవార్​. ప్రధాని నరేంద్ర మోదీతో భేటీ అయినప్పుడు ఇదే విషయాన్ని చెప్పానన్నారు. భాజపాకు ఎన్సీపీ మద్దతు సాధ్యం కాదని స్పష్టం చేసినట్లు పేర్కొన్నారు. కాంగ్రెస్-ఎన్సీపీ-శివసేనలకు ఒకరి సిద్ధాంతాల పట్ల మరొకరికి పూర్తి అవగాహన ఉందన్నారు శరద్ పవార్​. మరో ఐదేళ్ల పాటు కూటమి ప్రభుత్వమే అధికారంలో ఉంటుందని విశ్వాసం వ్యక్తం చేశారు.

ముందే తెలుసు..

మహారాష్ట్రలో భాజపా ప్రభుత్వ ఏర్పాటు సమయంలో అజిత్​ పవార్​తో దేవేంద్ర ఫడణవీస్ సంప్రదింపులు జరిపిన విషయం తనకు తెలుసని.. అజిత్ అలాంటి నిర్ణయం తీసుకుంటారని తాను ఊహించలేదని చెప్పారు పవార్​. ఆ తర్వాత జరిగిన పరిణామాల నేపథ్యంలో తన నిర్ణయం సరికాదని తెలుసుకుని మరునాడే తన వద్దకు వచ్చి డిప్యూటీ సీఎం పదవికి అజిత్​ రాజీనామా చేసినట్లు చెప్పారు​.

ఇదీ చూడండి:'భారత్​ మ్యాప్​' మళ్లీ మార్చేందుకు పార్లమెంట్ ఆమోదం