'యుద్ధంతో కాదు.. ప్రేమతో స్వాధీనం చేసుకుందాం' పాక్ ఆక్రమిత కశ్మీర్ (పీవోకే)ను బలవంతంగా భారత్లో కలుపుకోవాల్సిన అవసరం లేదని కశ్మీర్ గవర్నర్ సత్యపాల్ మాలిక్ వ్యాఖ్యానించారు. కశ్మీర్లో ప్రణాళికాబద్ధమైన అభివృద్ధిని చూసిన తరువాత వారే పాక్పై తిరుగుబాటు చేసి భారత్లో చేరుతారని విశ్వాసం వ్యక్తం చేశారు.
"గత 10 నుంచి 15 రోజులుగా చూస్తున్నాను. మన మంత్రులు చాలా మంది పీవోకేపై దండయాత్ర చేసి, దానిని భారత్లో కలపడం గురించి పదేపదే మాట్లాడుతున్నారు. నా నమ్మకం ఏంటంటే... జమ్ము కశ్మీర్ను అభివృద్ధి చేయడం ద్వారా పీవోకేను భారత్లో విలీనం చేసుకోగలుగుతాం."
- సత్యపాల్ మాలిక్, జమ్ము కశ్మీర్ గవర్నర్
ప్రేమించండి.. గౌరవించండి
కశ్మీర్ ప్రజలను దేశ ప్రజలంతా ప్రేమించాలి, గౌరవించాలని గవర్నర్ సత్యపాల్ మాలిక్ కోరారు.
"మనం జమ్ము కశ్మీర్ ప్రజలకు ప్రేమ, గౌరవం ఇవ్వాలి. వారి పిల్లల భవిష్యత్కు భద్రత కల్పించాలి. అలాగే వారి అభివృద్ధి, శ్రేయస్సును తీసుకురాగలగాలి. అలా చేయగలిగితే కచ్చితంగా ఒక్క సంవత్సరంలోగా పీవోకేలో తిరుగుబాటు చెలరేగుతుందని నేను హామీ ఇవ్వగలను. అపుడు పాక్తో ఎలాంటి పోరు చేయాల్సిన అవసరం ఉండదు. పీవోకే ప్రజలే స్వచ్ఛందంగా భారత్లోకి రావాలని కోరుకుంటారు. పీవోకే విషయంలో ఇదే నా ప్రణాళిక."
- సత్యపాల్ మాలిక్, జమ్ము కశ్మీర్ గవర్నర్
కశ్మీరీ విద్యార్థుల కోసం
దేశంలోని వివిధ రాష్ట్రాల్లో సుమారు 22 వేల మంది కశ్మీరీ విద్యార్థులు చదువుకుంటున్నారు. వీరికి సహాయం చేయడానికి ప్రతి రాష్ట్రంలోనూ అధికారులను నియమించినట్లు సత్యపాల్ మాలిక్ పేర్కొన్నారు. కశ్మీరీలను దేశ ప్రజలంతా ప్రేమగా చూసుకోవాలని ఆయన కోరారు.
ఇదీ చూడండి: సుప్రీంలో నలుగురు నూతన న్యాయమూర్తుల నియామకం
