'మహా'లో ఎన్​సీపీ-సేన-కాంగ్రెస్​కు లైన్​ క్లియర్​!

మహారాష్ట్ర ప్రభుత్వ ఏర్పాటుపై అనిశ్చితి కొనసాగుతోన్న వేళ.. ఎన్​సీపీ అధినేత శరద్​ పవార్ కీలక వ్యాఖ్యలు చేశారు. ఎన్​సీపీ, శివసేన, కాంగ్రెస్​ పార్టీలు ఐదేళ్ల సుస్థిర ప్రభుత్వాన్ని ఏర్పాటు చేస్తాయని ప్రకటించారు. ఈ నేపథ్యంలో గవర్నర్​తో మూడు పార్టీల నాయకుల సమావేశంపై సర్వత్రా ఆసక్తి నెలకొంది.

మహారాష్ట్రలో గతకొద్ది రోజులుగా రాజకీయ అనిశ్చితి నెలకొంది. ఇటీవలే రాష్ట్రపతి పాలన విధించింది కేంద్రం. ఈ పరిస్థితులు చూస్తుంటే.. మహారాష్ట్ర మధ్యంతర ఎన్నికల దిశగా సాగుతోందని అందరూ భావిస్తున్నారు. అయితే తాజాగా ఈ ఊహాగానాలను కొట్టి పారేశారు ఎస్​సీపీ అధినేత శరద్​ పవార్​. మధ్యంతర ఎన్నికలు వచ్చే ప్రసక్తే లేదని.. శివసేన-ఎన్​సీపీ-కాంగ్రెస్​ పార్టీలు కలిసి ప్రభుత్వాన్ని ఏర్పాటు చేస్తాయని స్పష్టం చేశారు. రాష్ట్రంలో స్థిరమైన ప్రభుత్వాన్ని ఏర్పాటు చేయాలని కోరుకుంటున్నట్లు పవార్​ చెప్పారు. ఇందుకోసం ప్రభుత్వ విధివిధానాలకు దిశానిర్దేశం చేసేలా.. మూడు పార్టీల ప్రతినిధులతో 'కనీస ఉమ్మడి కార్యక్రమం​(సీఎంపీ)'ను సిద్ధం చేస్తున్నట్లు తెలిపారు.

" మధ్యంతర ఎన్నికలకు ఆస్కారమే లేదు. ఐదేళ్లపాటు కొనసాగేలా శివసేన-ఎన్​సీపీ-కాంగ్రెస్​ ప్రభుత్వాన్ని ఏర్పాటు చేస్తాం."
-శరద్​ పవార్​, ఎన్​సీపీ అధినేత

ఫడణవీస్​పై విమర్శలు

మహారాష్ట్ర మాజీ ముఖ్యమంత్రి దేవేంద్ర ఫడణవీస్ ఎన్నికల సందర్భంగా చెప్పిన.. 'మీ పున్హా యెన్(మళ్లీ నేనే వస్తా)​' నినాదంపై శరద్ పవార్​ విమర్శలు చేశారు. తనకు దేవేంద్రతో చాలా ఏళ్లుగా పరిచయం ఉన్నా.. ఆయన జోతిష్య విద్యార్థి అని తెలియదని ఎద్దేవా చేశారు పవార్.

సేన హిందుత్వవాదానికి మద్దతిస్తారా?

ప్రభుత్వాన్ని ఏర్పాటు చేసే సందర్భంగా.. శివసేన పార్టీ హిందుత్వ వాదం వినిపిస్తే మీరు మద్దతిస్తారా? అన్న ప్రశ్నకు స్పందిస్తూ.. ఎస్​సీపీ-కాంగ్రెస్ పార్టీలు ఎప్పుడూ లౌకికవాదానికే మద్దతిస్తాయన్నారు పవార్​.

" హిందూ, ముస్లిం, బౌద్ధులకు మేము వ్యతిరేకం కాదు. అయితే అధికారంలో ఉన్నప్పుడు లౌకికవాదానికే మద్దతిస్తాం. ఈ అంశంపై సీఎంపీ సమావేశంలో ఏం చర్చించారో నాకు ఇంకా తెలియదు."
- శరద్​ పవార్​, ఎన్​సీపీ అధినేత

రేపే గవర్నర్​ వద్దకు..!

మహారాష్ట్రలో రైతుల సమస్యలపై చర్చించడానికి శివసేన, ఎన్​సీపీ, కాంగ్రెస్ నాయకులు రేపు గవర్నర్​ను కలవనున్నారు. ఈ మేరకు ఎన్​​సీపీ నేత నవాబ్ మాలిక్ వెల్లడించారు.

భాజపా-శివసేన విఫలం

మొత్తం 288 అసెంబ్లీ స్థానాలున్న మహారాష్ట్రలకు ఇటీవలే ఎన్నికలు జరిగాయి. భాజపా 105, శివసేన 56, కాంగ్రెస్​ 44, ఎన్​సీపీ 54 స్థానాల్లో గెలుపొందాయి. సీఎం పీఠాన్ని చెరిసగం పంచుకోవడంపై వివాదంతో భాజపా-శివసేన ప్రభుత్వాన్ని ఏర్పాటు చేయడంలో విఫలమయ్యాయి. ఫలితంగా మహారాష్ట్రలో రాజకీయ అనిశ్చితి నెలకొని.. రాష్ట్రపతి పాలన అమల్లోకి వచ్చింది.