'పౌరసత్వం పేరుతో భారతీయులను వేధించం'

పౌరసత్వం నిరూపణ పేరుతో ఏ భారతీయుడినీ వేధించబోమని కేంద్ర హోంశాఖ స్పష్టం చేసింది. 1971 కంటే ముందు కాలం నాటి తల్లిదండ్రులు, తాతల గుర్తింపు పత్రాలు అడగబోమని స్పష్టం చేసింది.

పౌరసత్వాన్ని నిరూపించుకునేందుకు పాత పత్రాలు సమర్పించమని ఏ భారతీయుడినీ వేధించబోమని కేంద్ర హోంమంత్రిత్వశాఖ వెల్లడించింది. 1971 కంటే ముందు కాలం నాటి తల్లిదండ్రులు, తాతల జనన ధ్రువీకరణ పత్రాలు, ఇతర గుర్తింపు పత్రాలు చూపించమని ఏ పౌరుడినీ వేధించడం జరగదని ట్విట్టర్​ వేదికగా స్పష్టం చేసింది.

నిరక్షరాస్యులైన పౌరులకు ఎలాంటి ధ్రువీకరణ పత్రాలు లేకపోతే.. స్థానికులు ఇచ్చే సాక్ష్యం, రుజువులు ఆధారంగా చూపిస్తే సరిపోతుందని కేంద్ర హోంశాఖ అధికార ప్రతినిధి తెలిపారు.

"పుట్టిన ప్రదేశం, తేదీ లేదా రెండింటికీ సంబంధించిన పత్రాలను సమర్పించడం ద్వారా భారత పౌరసత్వాన్ని నిరూపించుకోవచ్చు. దీనికి మరికొన్ని పత్రాలు జతచేస్తే సరిపోతుంది. భారతీయ పౌరులు అనవసరంగా వేధింపులు, అసౌకర్యాలకు గురికావడం జరగదు."
- కేంద్రహోంమంత్రిత్వశాఖ అధికార ప్రతినిధి

తీవ్ర వివాదాస్పద చట్టం

పాకిస్థాన్​, అఫ్గానిస్థాన్​, బంగ్లాదేశ్​ నుంచి వచ్చే ముస్లిమేతర వలసదారులకు భారత పౌరసత్వం కల్పించాలన్న లక్ష్యంతో.. పౌరసత్వ చట్ట సవరణ చేసింది కేంద్ర ప్రభుత్వం. దీనిపై దేశంలో తీవ్ర వ్యతిరేకత వ్యక్తమవుతోంది. ముఖ్యంగా ఈశాన్య భారత రాష్ట్రాలు ఈ చట్టం వల్ల తమ మనుగడకే ప్రమాదం ఏర్పడుతుందని ఆందోళన వ్యక్తం చేస్తున్నాయి.

ఇదీ చూడండి: 'ప్రజాస్వామ్యంలో ప్రజల నోరు నొక్కడం సరికాదు'