బిహార్లో భాజపా, జేడీయూ కూటమిలో పరిస్థితులన్నీ బాగానే ఉన్నాయని ముఖ్యమంత్రి నితీశ్ కుమార్ ఉద్ఘాటించారు. ఇటీవల జేడీయూ ఉపాధ్యక్షుడు ప్రశాంత్ కిశోర్.. భాజపా నాయకుడు, ఉప ముఖ్యమంత్రి సుశీల్ కుమార్ మోదీల మధ్య చెలరేగిన వాగ్వివాదం.. రాష్ట్ర రాజకీయాలలో చర్చనీయాంశంగా మారింది. వచ్చే ఏడాది బిహార్లో జరగనున్న అసెంబ్లీ ఎన్నికల్లో జేడీయూకు ఎక్కువ సీట్లు కేటాయించాలనే అంశంపై ఈ వివాదం మొదలైంది.
భాజపా నాయకుడు నవీన్ కిశోర్ ప్రసాద్ సిన్హా మృతికి సంతాపం తెలిపిన నితీశ్.. ఈ సందర్భంగా ఎన్డీయేలో అంతా బాగుందని స్పష్టం చేశారు.
వివాదం మొదలైందిలా
ఇటీవల ఓ మీడియా సమావేశంలో బిహార్లో రాబోయే ఎన్నికల్లో భాజపా కన్నా జేడీయూ అత్యధిక స్థానాల్లో పోటీ చేస్తుందని కిశోర్ వ్యాఖ్యలు చేశారు. అంతే కాకుండా పౌరసత్వ చట్టాన్ని వ్యతిరేకిసున్నట్లు తెలిపారు. ఈ నేపథ్యంలో ఉప ముఖ్యమంత్రి సుశీల్ కుమార్ ట్విట్టర్ వేదికగా స్పందించారు. ప్రధాని మోదీ, ముఖ్యమంత్రి నితీశ్ కుమార్ నేతృత్వంలో 2020 అసెంబ్లీ ఎన్నికల బరిలోకి దిగుతామని ఆయన అన్నారు. సీట్ల పంపకాల్లో ఇరు పార్టీలు సకాలంలో నిర్ణయించుకుంటాయని వెల్లడించారు. పౌరసత్వ చట్టంపై కిశోర్ చేసిన వ్యాఖ్యలపైనా స్పందించారు.
చట్టానికి వ్యతిరేకంగా వస్తోన్న నినాదాలు వింటే అసంతృప్తిగా ఉంది. రాజకీయాల్లోకి ఓ సిద్ధాంతంతో కాకుండా వ్యాపార దృక్పథంతో వచ్చి.. వ్యతిరేక నినాదాలతో ప్రజల దారిని మరల్చేందుకు ప్రయత్నిస్తున్నారు.
సుశీల్ కుమార్ మోదీ, బిహార్ ఉప ముఖ్యమంత్రి
ఈ వ్యాఖ్యలపై కిశోర్ ఘాటుగా స్పందించారు. నితీశ్ కుమార్ లాంటి గొప్ప నాయకత్వంలో జేడీయూ పార్టీ పెద్ద సామ్రాజ్యాన్ని స్థాపించిందన్నారు. ఉప ముఖ్యమంత్రి సుశీల్ కుమార్ రాజకీయాలపై ఉపన్యాసాలిస్తుంటే వినటానికి ఆహ్లాదంగా ఉందని వ్యంగ్యాస్త్రాలు సంధించారు.
