'దేశంలో ఆర్థిక మాంద్యం లేదు.. ఉండబోదు'

దేశంలో ప్రస్తుతం ఆర్థిక మాద్యం లేదని కేంద్ర ఆర్థిక మంత్రి నిర్మలా సీతారామన్ అన్నారు. ఆర్థిక పరిస్థితిపై రాజ్యసభలో సభ్యులు అడిగిన ప్రశ్నలకు సమాధానమిచ్చారు. 5 ట్రిలియన్ల ఆర్థిక వ్యవస్థను అందుకునేందుకు 32 చర్యలు తీసుకుంటున్నట్లు వివరించారు.

దేశంలో ఆర్థిక మందగమన పరిస్థితులు ఉన్నాయి తప్ప ఆర్థిక మాంద్యం పరిస్థితులు లేనేలేవని కేంద్ర ఆర్థిక మంత్రి నిర్మలా సీతారామన్‌ అన్నారు. ఆర్థిక పరిస్థితిపై రాజ్యసభలో సభ్యులు లేవనెత్తిన ప్రశ్నలకు ఆమె సమాధానం ఇచ్చారు. ఈ సందర్భంగా యూపీఏ ప్రభుత్వానికి, ఎన్డీఏ ప్రభుత్వం మధ్య వ్యత్యాసం గురించి లెక్కలతో సహా వివరించారు.

2009-14 యూపీఏ-2 హయాంలో 189.5 బిలియన్‌ డాలర్ల మేర విదేశీ ప్రత్యక్ష పెట్టుబడులు వస్తే అదే భాజపా హయాంలో ఆ సంఖ్య 284.9 బిలియన్‌ డాలర్లకు పెరిగిందని చెప్పారు. అదే సమయంలో విదేశీ మారక నిల్వలు సైతం 304.2 బిలియన్‌ డాలర్ల నుంచి 412.6 బిలియన్‌ డాలర్లకు పెరిగినట్లు వివరించారు నిర్మలా.

" దేశంలో ఆర్థిక మందగనం పరిస్థితులే ఉన్నాయి తప్ప.. ఎలాంటి మాంద్యం లేదు.. ఉండబోదు. సంక్షోభంలో ఉన్న బ్యాంకింగ్‌ రంగానికి ఊతమిచ్చేందుకు అనేక చర్యలు చేపట్టాం. అలాగే 5 ట్రిలియన్‌ ఆర్థిక వ్యవస్థను అందుకునేందుకు 32 చర్యలు తీసుకున్నాం." - నిర్మలా సీతారామన్‌, కేంద్ర ఆర్థిక మంత్రి