ఎర్రకోట ఘటనపై రంగంలోకి ఎన్​ఐఏ!

రైతులు చేపట్టిన 'గణతంత్ర పరేడ్'​లో.. ఎర్రకోట వద్ద జరిగిన హింసాత్మక ఘటనపై దర్యాప్తు చేసేందుకు జాతీయ దర్యాప్తు సంస్థ(ఎన్​ఐఏ) రంగంలోకి దిగినట్లు తెలుస్తోంది. ఈ ఘటనకు ప్రధాన బాధ్యులుగా భావిస్తున్న పంజాబ్​ గాయకుడు దీప్​ సిద్ధు, దీప్​ దీపు అనే మరో వ్యక్తికి మంగళవారం సాయంత్రమే ఎన్​ఐఏ నోటీసు పంపినట్లు సమాచారం.

రైతులు చేపట్టిన 'ట్రాక్టర్​ ర్యాలీ'లో దిల్లీలోని ఎర్రకోట వద్ద హింసాత్మక ఘటనలు చోటు చేసుకున్నాయి. ఈ ఘటనలపై జాతీయ దర్యాప్తు సంస్థ(ఎన్​ఐఏ) విచారణ చేపట్టినట్లు తెలుస్తోంది. ఎర్రకోట హింసాత్మక ఘటనలకు ప్రధాన బాధ్యులుగా భావిస్తున్న పంజాబ్‌ గాయకుడు దీప్ సిద్ధు, దీప్ దీపు అనే మరో వ్యక్తికి మంగళవారం సాయంత్రమే ఎన్​ఐఏ నోటీసు పంపినట్లు సమాచారం. ఆందోళనకారులు ఎర్రకోట వైపు వెళ్లేలా వీరు ప్రోత్సహించారన్న ఆరోపణలున్నాయి. ఎర్రకోట భద్రత, ఐటీ చట్టాల కింద ఎన్​ఐఏ కేసు నమోదు చేసినట్లు తెలుస్తోంది.

అనుమానితులపై నిఘా..

దీప్ సిద్ధుతో పాటు మరికొందరిపైనా ఎన్​ఐఏ కేసు నమోదు చేసినట్లు తెలుస్తోంది. రైతుల ఆందోళనల్లో చాలామంది అనుమానితులు ఉన్నాయని, తీవ్రమైన ఆరోపణలు ఉన్న వ్యక్తుల కదలికలపై నిఘా ఉంచినట్లు ఎన్​ఐఏ వర్గాలు తెలిపాయి.

దేశ రాజధాని దిల్లీలో మంగళవారం హింసాత్మక ఘటనలు జరిగిన నేపథ్యంలో.. భద్రత బలగాలను భారీగా మోహరించారు. దిల్లీ సరిహద్దుల్లో అన్నదాతలు ఆందోళనలు చేస్తున్న సింఘు, టిక్రీ ప్రాంతాల్లోనూ భద్రత పెంచారు. ఎర్రకోటను భద్రతా బలగాలు తమ అధీనంలోకి తీసుకున్నాయి.