కొవిడ్​నుంచి రక్షణకు సరికొత్త టీ షర్టులు

కరోనా వైరస్​ను నాశనం చేసే సరికొత్త టీషర్టులను మన దేశానికి చెందిన రెండు అంకుర సంస్థలు అభివృద్ధి చేశాయి. తక్కువ ధరకే వీటిని విపణిలోకి అందుబాటులోకి తీసుకొచ్చాయి.

కొవిడ్ మహమ్మారి నుంచి రక్షణ కల్పించేందుకు సరికొత్త టీషర్టులు, ఔషధ ద్రావణాన్ని మన దేశానికి చెందిన రెండు అంకుర సంస్థలు అభివృద్ధి చేశాయి. ఇ-టెక్స్, క్లెన్స్​టా అనేవి ఐఐటీ దిల్లీలో పురుడు పోసుకున్న రెండు అంకుర సంస్థలు. 'ఇ-టెక్స్ 'యాంటీవైరల్ ఫాబ్రిక్​తో తాజాగా టీ-షర్టులను తయారు చేసింది. వాటి ఉపరితలాన్ని తాకితే కరోనా వైరస్​ సహా ఏ సూక్ష్మజీవులైనా సరే అంతమవుతాయి. 30సార్లు ఉతికిన తరువాత కూడా యాంటీ వైరల్ సామర్థ్యాన్ని కోల్పోకపోవటం ఈ టీషర్టుల ప్రత్యేకత. వాటిపై ఉండే రసాయనం మానవులకు, ప్రకృతికి ఏమాత్రం హానికరం కాదని నిపుణులు తేల్చారు.

మరోవైపు తాము రూపొందించిన ఔషధ ద్రావణం 99.9శాతం వరకు సూక్ష్మక్రిములను నాశనం చేయగలదని క్లెన్స్​టా సంస్థ తెలిపింది. ఒక్కసారి పూసుకుంటే 24గంటలవరకు అది ప్రభావవంతంగా పనిచేస్తుందని వెల్లడించింది. ఇ-టెక్స్ టీషర్టులు, క్లెన్స్​టా ద్రావణంతో కూడిన కిట్​లను ఐఐటీ దిల్లీ డైరెక్టర్ వి. రామ్​గోపాల్​రావు శుక్రవారం ఆవిష్కరించారు.