కాంగ్రెస్​ సారథిగా ముకుల్​ వాస్నిక్​? నేడు సీడబ్ల్యూసీ భేటీ

కాంగ్రెస్​ నూతన అధ్యక్షుడు ఎవరన్న అంశంపై సందిగ్ధం నెలకొన్న తరుణంలో.. నేడు కాంగ్రెస్​ వర్కింగ్​ కమిటీ భేటీ కానుంది. ఈ సమావేశంలోనే పార్టీ తదుపరి సారథి ఎవరనే అంశంపై స్పష్టత వచ్చే అవకాశముంది. అయితే.. సీనియర్​ నేత ముకుల్​ వాస్నిక్​ అధ్యక్షుడు అయ్యే అవకాశాలు మెండుగా ఉన్నట్లు తెలుస్తోంది. మల్లికార్జున్​ ఖర్గే సహా మరికొందరు యువనేతలూ పోటీలో ఉన్నట్లు సమాచారం.

కాంగ్రెస్​ అధ్యక్ష పదవికి రాహుల్​ గాంధీ రాజీనామా చేసిన అనంతరం.. పార్టీలో నాయకత్వ సంక్షోభం నెలకొంది. తదుపరి సారథి ఎంపికపై అనేక ఊహాగానాల నేపథ్యంలో నేడు కాంగ్రెస్​ వర్కింగ్​ కమిటీ(సీడబ్ల్యూసీ) సమావేశమవనుంది. ఈ భేటీలోనే నూతన అధ్యక్షుడిపై ఒక నిర్ణయానికి వచ్చే అవకాశముంది.

ముకుల్​ వాస్నిక్​కే అవకాశం..!

నేడు సీడబ్ల్యూసీ సమావేశం నేపథ్యంలో.. పార్టీ సీనియర్​ నేతలు యూపీఏ ఛైర్​పర్సన్​ సోనియాగాంధీతో శుక్రవారం భేటీ అయ్యారు. అహ్మద్​ పటేల్​, ఏకే ఆంటోనీ, కేసీ వేణుగోపాల్​.. పార్టీ అధ్యక్ష పదవి కోసం కొందరి పేర్లు సోనియాకు ప్రతిపాదించినట్లు తెలుస్తోంది. ముకుల్​ వాస్నిక్​, మల్లికార్జున్​ ఖర్గే సహా కొందరు యువనేతలు పోటీలో ఉన్నారు. అయితే.. అధ్యక్ష పదవి వాస్నిక్​కు దక్కే అవకాశాలు మెండుగా ఉన్నట్లు తెలుస్తోంది. 134 ఏళ్ల కాంగ్రెస్​ చరిత్రలో.. 2 దశాబ్దాల తర్వాత గాంధీయేతర వ్యక్తి పార్టీ సారథి అయ్యే అవకాశాలున్నాయి.

పీవీ నరసింహారావు, మన్మోహన్​ సింగ్​ ప్రభుత్వ హయాంలో పనిచేసిన వాస్నిక్​.. సోనియాకు కార్యదర్శిగానూ వ్యవహరించారు. కేంద్ర మంత్రిగానూ బాధ్యతలు నిర్వర్తించారు.

70 రోజులు...

మే 25న కాంగ్రెస్​ అధ్యక్ష పదవికి రాహుల్​ గాంధీ రాజీనామా చేశారు. ఆ తర్వాత నాయకత్వలేమితో పార్టీపై తీవ్ర ప్రభావం పడింది. కర్ణాటక, మహారాష్ట్ర నుంచి పలువురు నాయకులు కాంగ్రెస్​ను వీడారు. రాజ్యసభ ఎంపీ సంజయ్​ సింగ్​ ఇటీవలే పార్టీకి రాజీనామా చేశారు. నూతన అధ్యక్షుడి ఎంపిక ఆలస్యమైతే.. హస్తం పార్టీకి మరిన్ని ఇబ్బందులు తప్పకపోవచ్చని ఇటీవల కొందరు సీనియర్లు తమ అభిప్రాయాలను వ్యక్తం చేశారు. ఈ తరుణంలో.. నూతన సారథి ఎన్నిక వీలైనంత త్వరగా చేపట్టాలని నిర్ణయించింది పార్టీ.

ఇదీ చూడండి: మోదీకి రాహుల్​ ఫోన్​... ఎందుకో తెలుసా?