ఆ ఒక్క కారణంతో 18 వేల మంది ఖైదీలు విడుదల

ఈ నెల 25 నాటికి దాదాపు 18వేల మంది ఖైదీలను పెరోల్​పై విడుదల చేసింది ఉత్తరప్రదేశ్​ ప్రభుత్వం. కరోనా వైరస్​ నేపథ్యంలో సుప్రీంకోర్టు ఆదేశాల మేరకు ఈ చర్యలు చేపట్టింది.

కరోనా సంక్షోభం నేపథ్యంలో సుప్రీంకోర్టు ఆదేశాల మేరకు దాదాపు 18వేల మంది ఖైదీలను పెరోల్​పై విడుదల చేసింది ఉత్తరప్రదేశ్​. ఈ విషయాన్ని ఆ రాష్ట్ర అదనపు ముఖ్య కార్యదర్శి(హోం) అవానిష్​ కుమార్​ అవస్థి వెల్లడించారు.

"సుప్రీంకోర్టు ఆదేశాలతో ఈ నెల 25 నాటికి 17వేల 963మంది ఖైదీలను పెరోల్​పై విడుదల చేశాం. రాష్ట్రవ్యాప్తంగా ఉన్న ఖైదీల్లో ఇది 15-17శాతం ఉంటుంది. జువనైల్​ జస్టిస్​ బోర్డు అనుమతులతో బాలల సంరక్షణ గృహాల నుంచి 665 మందిని కూడా పెరోల్​పై విడుదల చేశాం."

--- అవానిష్​ కుమార్​ అవస్థి

ఏడేళ్లుగా జైలు శిక్ష అనుభవిస్తున్న ఖైదీలను పెరోల్​పై విడుదల చేయాలని అన్ని రాష్ట్రాలను అత్యున్నత న్యాయస్థానం ఆదేశించింది. కరోనా వైరస్​ వ్యాప్తి కారణంగా ఈ నిర్ణయం తీసుకుంది.

వలస కార్మికులు...

1,658 రైళ్ల ద్వారా 22.37లక్షలమంది వలస కార్మికులను రాష్ట్రానికి తీసుకొచ్చినట్టు అవానిష్​ తెలిపారు. 82 రైళ్లలో 2వేల 767మందిని వారి సొంత రాష్ట్రాలకు పంపించినట్టు స్పష్టం చేశారు.