ఇరిగేషన్ కుంభకోణం కేసులో ఎన్సీపీ నేత అజిత్ పవార్కు ఊరట లభించింది. ఈ మేరకు మహారాష్ట్ర అవినీతి నిరోధక శాఖ (అనిశా) ఆయనకు క్లీన్ చిట్ ఇచ్చింది. అనిశా సమర్పించిన నివేదిక ఆధారంగా విదర్భ ప్రాంతంలో నీటి పారుదల ప్రాజెక్టుల టెండర్ల అనుమతికి సంబంధించి జరిగిన అవినీతిలో అజిత్ పవార్ ప్రమేయం ఉందన్న ఆరోపణలను బాంబే హైకోర్టు నాగ్‌పుర్‌ బెంచ్‌ కొట్టివేసింది. ఈ కేసుకు సంబంధించి అఫిడవిట్‌ను మహా వికాస్‌ అఘాడీ (శివసేన-ఎన్సీపీ-కాంగ్రెస్‌) ప్రభుత్వ ఏర్పాటుకు ఒక రోజు ముందు నవంబరు 27న అనిశా కోర్టుకు సమర్పించింది.
ఇదీ కేసు
2012లో బాంబే హైకోర్టులోని నాగ్‌పుర్‌ బెంచ్‌ ముందు రెండు ప్రజాప్రయోజన వ్యాజ్యాలు దాఖలయ్యాయి. వాటి ఆధారంగా విదర్భ నీటిపారుదల అభివృద్ధి కార్పొరేషన్ (వీఐడీసీ)లో 45 ప్రాజెక్టుల్లో 2,654 టెండర్లకు సంబంధించి అనిశా దర్యాప్తు చేస్తుంది. నవంబరు 25న అవినీతి వ్యతిరేక సంస్థ అవినీతి ఆరోపణలున్న నీటిపారుదల ప్రాజెక్టులకు సంబంధించి తొమ్మిది కేసుల్లో విచారణ నిలిపివేస్తున్నట్లు ప్రకటించింది. అయితే వాటితో అజిత్ పవార్కు ఎలాంటి సంబంధం లేదని ప్రకటించింది. ‘‘దర్యాప్తులో ఎవరికి వ్యతిరేకంగా నేరం చేసినట్లు ఆధారాలు లభించనందున విచారణ ఆపేస్తున్నాం. అయితే ఈ తొమ్మిది కేసులతో అజిత్ పవార్, ఒకప్పటి వీఐడీసీ ఛైర్మన్‌కు ఎలాంటి సంబంధం లేదు’’ అని అనిశా పేర్కొంది.