గల్లంతైన విమానం వేటలో ఇస్రో, నేవీ

భారత వాయుసేన విమానం 'ఏఎన్​-32'ను వెతికేందుకు నౌకాదళం, ఇస్రో రంగంలోకి దిగాయి. అరుణాచల్​ ప్రదేశ్​, అసోం ప్రాంతాల్లో అణువణువూ గాలింపు చేపట్టేందుకు శాటిలైట్​లను మోహరించింది ఇస్రో. అనుమానిత ప్రాంతాలను నావికా దళానికి చెందిన 'పీ-8ఐ  స్పై' విమానాలు జల్లెడ పడుతున్నాయి.

అరుణాచల్​ ప్రదేశ్​లో గల్లంతైన భారత వాయుసేన విమానం 'ఏఎన్​-32'ను వెతికేందుకు అన్ని రకాల అవకాశాలను ఉపయోగిస్తోంది సైన్యం. తాజాగా నౌకాదళం, ఇస్రో శాటిలైట్​లు రంగంలోకి దిగాయి. ఇప్పటికే 'సుఖోయ్​-30, సీ-130జే సూపర్​ హెర్క్యులస్'​ యుద్ధవిమానాలు అన్ని ప్రాంతాలను జల్లెడ పడుతున్నాయి.

అరుణాచల్​ ప్రదేశ్​, అసోం రాష్ట్రాల పరిధిలో విస్త్తృతంగా వెతికేందుకు శాటిలైట్​లను మోహరించింది ఇస్రో. అనుమానిత ప్రాంతాలను గాలించేందుకు నావికా దళానికి చెందిన 'పీ-8ఐ స్పై' విమానాలు తమిళనాడు ఆరక్కోణం నుంచి బయలుదేరాయి.

ఇప్పటికీ ఆచూకీ లభించకపోవటంపై విమానంలో ఉన్న వారి కుటుంబ సభ్యులు ఆందోళన పడుతున్నారు. పరిస్థితిని రక్షణమంత్రి రాజ్​నాథ్​ ఎప్పటికప్పుడు సమీక్షిస్తున్నారు.

ఎలా జరిగింది?

అసోంలోని జోహ్రాత్​​ ఎయిర్​బేస్​ నుంచి సోమవారం మధ్యాహ్నం 12:25 గంటలకు బయలు దేరింది విమానం. ఒంటి గంట సమయంలో అరుణాచల్​ప్రదేశ్​లోని మెన్చూకా గగనతలం వద్ద సంబంధాలు తెగిపోయాయి. విమానంలో ఏడుగురు అధికారులు, ఆరుగురు వైమానిక దళ సభ్యులు ఉన్నారు.

ఏఎన్​-32

రష్యా సాంకేతికతతో తయారు చేసిన ఈ విమానాలు భారత వాయుసేన వద్ద పరిమితంగా ఉన్నాయి. జంట టర్బో ప్రాప్ ​ఇంజిన్​లతో నడిచే ఈ విమానాన్ని రవాణా అవసరాల కోసం ఉపయోగిస్తుంది వాయుసేన. ఈ విమానాలను పలుమార్లు ఆధునికీకరించారు.

2016 జులైలో చెన్నై నుంచి పోర్ట్​బ్లెయిర్​ వెళుతున్న ఏఎన్​-32 విమానం అదృశ్యమయింది. సుమారు 2 లక్షల చదరపు నాటికల్​ మైళ్ల పరిధిలో సుధీర్ఘ కాలం గాలింపు చేపట్టినా ఆచూకీ లభించలేదు. ఫలితంగా అందులో ప్రయాణించిన 29 మంది మరణించినట్టు వాయుసేన విచారణ కోర్టు ప్రకటించింది.

2009జూన్​లో అరుణాచల్​ ప్రదేశ్​లోని పశ్చిమ సియాంగ్​ జిల్లాలో మరో విమానం కూలిపోయింది. ఈ ఘటనలో 13 మంది అధికారులు మరణించారు.

ఇదీ చూడండి: 13 మంది సహా భారత యుద్ధ విమానం గల్లంతు