'అందుకు కలాంనే ఆదర్శంగా తీసుకోవాలి'

ఆర్థిక, సామాజిక సవాళ్లను అధిగమించే దిశగా యువత ముందడుగు వేయాలని ఉపరాష్ట్రపతి వెంకయ్యనాయుడు పిలుపునిచ్చారు. ఇందుకు సాంకేతిక పరిజ్ఞానం ఉపయోగించుకొని అద్భుతాలు సృష్టించిన మాజీ రాష్ట్రపతి అబ్దుల్​ కలాం ఆలోచన విధానాన్ని అందిపుచ్చుకోవాలని సూచించారు.

దేశం ఎదుర్కొంటున్న ఆర్థిక, సామాజిక సవాళ్ల పరిష్కారానికి యువత వినూత్నంగా ఆలోచించాలని ఉపరాష్ట్రపతి వెంకయ్యనాయుడు పిలుపునిచ్చారు. అందుకు మాజీ రాష్ట్రపతి అబ్దుల్​ కలాంను ఆదర్శంగా తీసుకోవాలని సూచించారు. లాక్​డౌన్​ సమయంలో వలస కూలీలు పడిన అవస్థను గుర్తు చేసిన ఆయన.. గ్రామాల్లో, చిన్న పట్టణాల్లో ఉపాధి, ఆర్థిక అవకాశాలను సృష్టించాల్సిన అవసరం ఉందని అభిప్రాయపడ్డారు.

'40 ఇయర్స్​ విత్​ కలాం-అన్​టోల్డ్ స్టోరీస్​' అనే పుస్తకాన్ని వర్చువల్​ విధానంలో ఆవిష్కరించిన సందర్భంగా ఈ వ్యాఖ్యలు చేశారు వెంకయ్య.

"అభివృద్ధి వికేంద్రీకరణ ప్రణాళికలతో స్థానిక సంస్థల సామర్థ్యాన్ని పెంచాలి. కుటీర పరిశ్రమలను పెద్ద ఎత్తున ప్రోత్సహించడంపై దృష్టి సారించాలి. తద్వారా మన గ్రామాలు, పట్టణాలు వృద్ధి కేంద్రాలుగా మారతాయి."

-వెంకయ్యనాయుడు, ఉపరాష్ట్రపతి

కలాం ఓ కర్మయోగి..

మాజీ రాష్ట్రపతి అబ్దుల్​ కలాం ఓ కర్మయోగి అని వెంకయ్య నాయుడు కొనియాడారు. భారతదేశం రక్షణ, అంతరిక్ష సామర్థ్యాలను బలోపేతం చేయడంలో కలాం కృషి అమూల్యమైనదని అన్నారు. ఈ క్రమంలో ఆయనతో ఉన్న వ్యక్తిగత అనుబంధాన్ని గుర్తు చేసుకున్నారు.