బిడ్డకు 'మోదీ' పేరు పెట్టిన ముస్లిం మహిళ

ప్రధాని పాలనకు ముగ్ధురాలైన ఓ ముస్లిం మహిళ.. తన కుమారుడికి 'నరేంద్ర దామోదరదాస్​ మోదీ' అని నామకరణం చేసింది. కుటుంబం వారించినా తన నిర్ణయంపై వెనక్కి తగ్గలేదు మైనాజ్ బేగం. చివరకు పేరు నమోదుకు కుటుంబ సభ్యులంతా కలిసి ప్రమాణపత్రం సమర్పించారు.

ప్రధాని నరేంద్రమోదీపై అభిమానాన్ని వినూత్నంగా చాటింది ఓ ముస్లిం మహిళ. తనకు పుట్టిన కుమారుడికి 'నరేంద్ర దామోదర దాస్​ మోదీ' పేరు పెట్టాలని నిర్ణయించింది. అయితే కుటుంబ సభ్యులు ఆమె మనసు మార్చేందుకు ప్రయత్నించి విఫలమయ్యారు.

ఉత్తరప్రదేశ్​ గోండాలో జీవిస్తున్నారు మైనాజ్​ బేగం. ఆమె భర్త ముస్తాక్​ అహ్మద్​ దుబాయిలో ఉంటున్నాడు. ఈ నెల 23న వారికి ఓ కుమారుడు జన్మించాడు. ఆ పిల్లాడికి మోదీ పేరు పెట్టాలని బేగం భీష్మించగా ముస్తాక్​ వారించాడు. అతని తండ్రి ఇద్రీస్​ కూడా ఆమె మనసు మార్చేందుకు ప్రయత్నించాడు. కానీ ఆమె పట్టు విడువలేదు. చివరికి పేరు నమోదుకు కుటుంబమంతా కలిసి స్థానిక పంచాయతీ కార్యాలయంలో ప్రమాణ పత్రం సమర్పించారు.

"దేశంకోసంమోదీ ఎంతో కష్టపడుతున్నారు. సంక్షేమ పథకాలు ఎంతో బాగున్నాయి. మరుగుదొడ్ల నిర్మాణానికి ఆర్థిక సాయం అందించారు. పేద మహిళలకు వంట చేసుకునేందుకు ఉచితంగా గ్యాస్​ అందించారు. ఇది మేం వ్యక్తిగతంగా తీసుకున్న నిర్ణయం. ఇందులో ఎవరి జోక్యం, బలవంతం లేదు. చట్ట ప్రకారం నమోదు ప్రక్రియ పూర్తి చేయాలని మనవి."

-ప్రమాణ పత్రంలోని సారాంశం

ఇదీ చూడండి: సరికొత్త ఉత్సాహంతో ముందుకెళ్దాం: మోదీ