లోక్​సభ స్పీకర్​గా ఓం బిర్లా.. ఎన్నిక ఏకగ్రీవం

ఎన్డీఏ నామినేట్ చేసిన ఓం బిర్లా లోకసభ స్పీకర్​గా ఏకగ్రీవంగా ఎన్నికయ్యారు. బిర్లా పేరును ప్రతిపాదిస్తూ ప్రధాని నరేంద్ర మోదీ తీర్మానం ప్రవేశపెట్టగా కేంద్రమంత్రులంతా మద్దుతు తెలిపారు. మూజువాణి ఓటు ద్వారా తీర్మానాన్ని ఆమోదించారు ప్రోటెం స్పీకర్​ వీరేంద్ర కుమార్​.

17వ లోక్‌సభ స్పీకర్‌గా భాజపా ఎంపీ ఓం బిర్లా ఏకగ్రీవంగా ఎన్నికయ్యారు. స్పీకర్‌ పదవికి బిర్లా పేరును ప్రధాన మంత్రి నరేంద్రమోదీ ప్రతిపాదించగా కేంద్ర మంత్రులు రాజ్‌నాథ్‌సింగ్‌, గడ్కరీ, అమిత్‌షాతో పాటు వివిధ పార్టీల ఎంపీలు సమర్థించారు. ప్రొటెం స్పీకర్‌ వీరేంద్ర కుమార్‌ మూజువాణి ఓటు ద్వారా ఎన్నిక ప్రక్రియ చేపట్టగా.. సభ్యులు బిర్లాను ఏకగ్రీవంగా ఎన్నుకున్నారు. ఓం బిర్లాను లోక్​ సభ స్పీకర్​గా ప్రతిపాదిస్తూ మొత్తం 13 తీర్మానాలు అందాయి.

స్పీకర్‌గా ఎన్నికైన ఓం బిర్లాను ప్రధాని నరేంద్రమోదీ, కాంగ్రెస్​ లోక్​సభ పక్ష నేత అధీర్‌ రంజన్‌లు సభాస్థానం వరకూ తీసుకెళ్లారు. స్పీకర్‌ స్థానంలో బిర్లా ఆసీనులయ్యారు.

భాజపా, కాంగ్రెస్, డీఎంకే, తృణమూల్​ ఎంపీలు స్పీకర్ పోడియం వద్దకు వెళ్లి అభినందనలు తెలిపారు.

వ్యాపార వర్గానికి చెందిన 56 ఏళ్ల ఓం బిర్లా అమిత్‌షా, మోదీకి అత్యంత సన్నిహితులు. కోటా-బుందీ నియోజకవర్గం నుంచి 2014లో తొలిసారిగా ఆయన లోక్‌సభకు ఎన్నికయ్యారు. 2019లో వరుసగా రెండోసారి 2.79 లక్షల ఓట్ల మెజార్టీతో ఘన విజయం సాధించారు. గతంలో రాజస్థాన్‌ ఎమ్మెల్యేగా పనిచేశారు.

ఇదీ చూడండి: స్పీకర్​గా బిర్లా ఎన్నికవడం గర్వకారణం : మోదీ