'అరేవా.. ఈ ఎన్నికలు బిగ్బాస్ కంటే ఆసక్తికరంగా ఉన్నాయి డ్యూడ్..'
'అబ్బబ్బా.. ఏమి ఎత్తులు, ఏమి ట్విస్టులు... క్రికెట్ చూస్తున్నంత ఉత్కంఠగా ఉంది.'
'వారి వారి రంగాల్లో.. వారిద్దరే అసలు సిసలైన ముగింపు ఆటగాళ్లు అని నాకు పుట్టబోయే పిల్లలకు చెప్తా'
'పెద్దన్న మాట్లాడినప్పటికంటే.. ఏమీ మాట్లాడనప్పుడే.. ప్రతిపక్షాలు భయపడేలా చేశారే.'
'కొద్ది రోజులుగా టీవీ సీరియల్లా సాగుతూనే ఉన్నా.. డ్రామా, ఉత్కంఠ, ట్రయాంగిల్ లవ్, దుఃఖం కలగలిపిన ఇలాంటి చిత్రాన్ని బాలీవుడ్ కాదు కదా.. హాలీవుడ్ కూడా నిర్మించలేదు.'
అవును.. మీరు ఊహించింది నిజమే. ఈ మాటలన్నీ మహారాష్ట్ర రాజకీయ మలుపుపై ట్విట్టర్లో సామాన్య ప్రజానీకం పోస్ట్ చేసినవే.
ఎన్సీపీ, శివసేన, కాంగ్రెస్ కూటమి ప్రభుత్వాన్ని ఏర్పాటు చేస్తోందని అందరూ అనుకున్నారు. కానీ మహారాష్ట్రలో భాజపా ప్రభుత్వం ఏర్పడేసరికి అవాక్కయిన నెటిజన్లు.. ట్వీట్లు, రీట్వీట్లు, కామెంట్లు, కాంప్లిమెంట్లతో ట్విట్టర్ను హోరెత్తించారు.
ఆ రంగంలో 'అమిత్ షా'నే బెస్ట్ ఫినిషర్..! షా ఇచ్చిన షాక్పై...
భాజపా ఎత్తుగడను.. హెచ్బీఓ ఛానల్లో ప్రసారమైన ప్రముఖ వెబ్ సిరీస్ "గేమ్ ఆఫ్ థ్రోన్స్"లోని ఆఖరి మలుపులాగా, ఎంతో ఉత్కంఠగా ఉందని ఒకరు వివరిస్తే.. మరొకరు అమిత్ షా 'చాణక్య' తెలివితో ధోనీలాగే ఆటకు 'అసలైన ముగింపునిచ్చే ఆటగాడి'గా నిరూపించుకున్నారు అని ట్వీట్ చేశారు.
ఆ రంగంలో 'అమిత్ షా'నే బెస్ట్ ఫినిషర్..! క్రికెట్లో ధోనీ.. రాజకీయాల్లో అమిత్ షాను ఎవరూ మించలేరని కొందరు వ్యాఖ్యానించారు.
కూటమిపై..
శివసేన, కాంగ్రెస్, ఎన్సీపీ కూటమి పరిస్థితిపై... 'అయ్యో నోటికొచ్చిన కూడు చేయి జారిందే' అని ట్విట్టర్లో కొందరు జాలి చూపితే, మరికొందరు 'పాప ఫలం అనుభవిస్తున్నారంటూ' దెప్పిపొడిచారు.
ట్విట్టింట మెరిసిన హ్యాష్ట్యాగ్లు
మహారాష్ట్ర రాజకీయ పరిణామాలపై ట్విట్టర్లో కొన్ని హ్యాష్ట్యాగ్లు బాగా ట్రెండ్ అయ్యాయి. అందులో #మహారాష్ట్ర రాజకీయాలు, #దేవేంద్ర_ఈజ్_బ్యాక్, #అమిత్షా_బెస్ట్_ఫినిషర్ #మహా_కిచిడీ_సర్కార్, #చాణక్య, #సంజయ్ రౌత్, #అమిత్షా, #మోటాభాయి, #గేమ్_ఆఫ్_థ్రోన్స్ వంటివి విరివిగా వాడేశారు.
https://etvbharatimages.akamaized.net/etvbharat/prod-images/5157096_sang-4.JPG ఇదీ జరిగింది...
ఎన్నికల ఫలితాలు విడుదలైన అక్టోబర్ 24 నుంచి దాదాపు నెల రోజులపాటు సాగిన మహారాష్ట్ర సీఎం సీటు సమరం.. థ్రిల్లర్ సినిమాను తలపించింది. శివసేన-భాజపా మిత్రపక్షాలుగా ప్రభుత్వాన్ని ఏర్పరుస్తాయనుకున్నారు. కానీ సేన 'చెరిసగం ఫార్ములా' వల్ల అది కుదరలేదు. ప్రభుత్వ గడువు ముగిసింది. గవర్నర్ ఒక్కో పార్టీని పిలిచి ప్రభుత్వం ఏర్పాటు చేయమని కోరినా పార్టీలన్నీ విఫలమయ్యాయి. ఇక రాష్ట్రంలో రాష్ట్రపతి పాలనను విధించారు గవర్నర్.
అనంతరం కాంగ్రెస్, ఎన్సీపీతో కలిసి ప్రభుత్వాన్ని ఏర్పాటు చేసి సీఎం సీటుపై జెండా పాతేద్దామనుకుంది శివసేన. కానీ అదే సమయంలో సేన సహా ఎన్సీపీ-కాంగ్రెస్కు భాజపా ఊహించని షాక్ ఇచ్చింది. శరద్పవార్ సోదరుని కుమారుడు అజిత్ పవార్తో కలిసి.. ఎన్సీపీ సహకారంతో ప్రభుత్వం ఏర్పాటు చేసింది. ముఖ్యమంత్రిగా దేవేంద్ర ఫడణవీస్, ఉప ముఖ్యమంత్రిగా అజిత్ పవార్ ప్రమాణ స్వీకారం చేశారు.
ఇదీ చదవండి:మహా పీఠం తెర వెనుక కీలక పాత్ర?
