భారత్ ప్రతిష్ఠాత్మకంగా తీసుకున్న చంద్రయాన్-3 ప్రయోగం 2021 తొలినాళ్లలోనే చేపట్టే అవకాశం ఉందని కేంద్ర మంత్రి జితేంద్ర సింగ్ తెలిపారు. అయితే.. చివరి క్షణంలో విఫలమైన చంద్రయాన్-2 మాదిరిగా ఇందులో ఆర్బిటర్ ఉండదని తెలిపారు. ల్యాండర్, రోవర్లు ఉంటాయన్నారు.
"జాబిల్లిపై ఇస్రో తొలి ప్రయోగం చంద్రయాన్-1ను 2008లో చేపట్టింది. అది చంద్రుడి ధ్రువాల వద్ద తుప్పు పడుతున్నట్లు చిత్రాలను పంపింది. దాంతో చంద్రుడిపై ఇనుముతో కూడిన రాతినేల ఉందని తేలినప్పటికీ.. అక్కడ నీరు, ఆక్సిజన్ ఉన్నట్లు ఇంకా తెలియదు. చంద్రుడి ధ్రువాల వద్ద తుప్పు జాడలు కేవలం భూమి వాతావరణం కారణంగానే జరుగుతున్నట్లు నాసా శాస్త్రవేత్తలు తెలిపారు. చంద్రయాన్-1 సమాచారం ప్రకారం జాబిల్లి ధ్రువాల వద్ద నీటి జాడలు ఉన్నట్లు తెలుస్తోంది. దానిని తెలుసుకునేందుకే శాస్త్రవేత్తలు ప్రయత్నాలు చేస్తున్నారు. ల్యాండింగ్ సమయంలో సమస్య తలెత్తి విఫలమైన చంద్రయాన్-2 మాదిరిగానే ఈ ప్రాజెక్టు ఉన్నప్పటికీ.. ఇందులో ఆర్బిటర్ ఉండదు. మరోవైపు.. భారత్ తొలిసారిగా చేపడుతోన్న మానవ సహిత గగన్యాన్ ప్రాజెక్టు పనులు ముమ్మరంగా సాగుతున్నాయి. వ్యోమగాములకు శిక్షణ సహా ఇతర పనులు కొనసాగుతున్నాయి."