ఈ ఏడాది వర్షాకాలం.. సాధారణం, అంతకంటే ఎక్కువ స్థాయిలో ముగిసే అవకాశముందని భారత వాతావరణశాఖ(ఐఎమ్డీ) అంచనా వేసింది. జూన్, ఆగస్టులో సాధారణం కన్నా 17శాతం, 24శాతం ఎక్కువగా వర్షపాతం నమోదైందని పేర్కొంది. అయితే జులైలో మాత్రం 10శాతం తక్కువ రికార్డయిందని వెల్లడించింది.
వర్షాకాలంలో పూర్తి వర్షపాతం.. దీర్ఘకాలిక సగటు(ఎల్పీఏ)లో 102శాతం ఉండే అవకాశముందని ఐఎమ్డీ పేర్కొంది. 96నుంచి104శాతంగా ఉంటే దాన్ని సాధారణ వర్షపాతంగా గుర్తిస్తారు.
సెప్టెంబర్లో ఇలా...
ఈసారి సాధారణం కన్నా ఎక్కువ వర్షపాతం నమోదయ్యే అవకాశాలున్న నేపథ్యంలో.. వ్యవసాయానికి బాగా ఉపయోగపడుతుందని భూశాస్త్ర మంత్రిత్వశాఖ కార్యదర్శి రాజీవన్ అభిప్రాయపడ్డారు. ఫలితంగా దేశ ఆర్థిక వ్యవస్థ మెరుగుపడుతుందని ఆశాభావం వ్యక్తం చేశారు.
అయితే ఈ నెల మొదటి వారంలో పర్వత ప్రాంతాలు, ఉత్తరంలోని మైదాన ప్రదేశాలు, దక్షిణ ద్వీపకల్పంలో వర్షాలు అనుకున్న దాని కన్నా ఎక్కువ కురిశాయని రాజీవన్ వెల్లడించారు. అయితే రెండో వారంలో ఇది తగ్గే అవకాశముందని పేర్కొన్నారు. మూడో వారంలో భారీ వర్షాలు కురుస్తాయని, చివరి వారంలో సాధారణ వర్షపాతం నమోదవుతుందని అంచనా వేశారు.
ఇదీ చూడండి:-యాంటీబాడీలు ఉన్నా కరోనా నుంచి రక్షణ కష్టమే!
