ఎన్​ఆర్సీపై భాజపా వెనక్కి తగ్గిందా? కారణమేంటి?

దేశవ్యాప్తంగా ఎన్​ఆర్సీ అమలుపై భాజపా వెనక్కి తగ్గే సూచనలు కనిపిస్తున్నాయి. నిన్న దిల్లీలో జరిగిన ర్యాలీలో ప్రధాని నరేంద్ర మోదీ వ్యాఖ్యలను గమనిస్తే ఈ విషయం స్పష్టమవుతోంది. దేశవ్యాప్తంగా నిరసనలు వ్యక్తమవుతున్న నేపథ్యంలో వ్యూహాత్మకంగానే భాజపా ఈ నిర్ణయం తీసుకున్నట్లు తెలుస్తోంది.

జాతీయ పౌర జాబితా (ఎన్​ఆర్​సీ) గురించి తమ ప్రభుత్వం చర్చించలేదని ప్రధాని నరేంద్ర మోదీ చేసిన వ్యాఖ్యలతో ప్రస్తుతానికి ఎన్​ఎఆర్​సీ అమలును భాజపా పక్కనబెట్టే సూచనలు కనిపిస్తున్నాయి. పౌరసత్వ చట్టం, ఎన్​ఆర్​సీపై దేశవ్యాప్తంగా ఆందోళన వ్యక్తమవుతున్న నేపథ్యంలో వ్యూహాత్మకంగా వెనక్కి తగ్గాలని భాజపా భావిస్తోంది.

దేశమంతా ఎన్​ఆర్​సీని అమలు చేస్తామని కేంద్ర హోంమంత్రి అమిత్‌ షా పార్లమెంటులో సహా పలు మార్లు ప్రకటించారు. భాజపా కార్యనిర్వాహక అధ్యక్షుడు జేపీ నడ్డా సహా పలువురు అగ్ర నేతలు ఇదే విషయాన్ని పలు ఎన్నికల ర్యాలీల్లో పదే పదే ప్రస్తావించారు. భాజపా దేశాన్ని విభజిస్తోందంటూ దేశవ్యాప్తంగా ఆందోళనలు ఉవ్వెత్తున ఎగసిపడ్డాయి. దేశంలోని వివిధ వర్గాల నుంచి వచ్చిన వ్యతిరేకత, ముఖ్యంగా ముస్లిం వర్గాల్లో భయాందోళనలు భాజపాను పునరాలోచనలో పడేశాయి.

దిల్లీలోని రామ్​లీలా మైదానంలో నిన్న జరిగిన ర్యాలీలో ఎన్​ఆర్​సీపై మోదీ స్పందించారు. తమ ప్రభుత్వం ఇంతవరకు ఎన్​ఆర్​సీ గురించి చర్చించనే లేదని చెప్పుకొచ్చారు. ఈ నేపథ్యంలో సమీప భవిష్యత్‌లో ఈ అంశంపై భాజపా నేతలు మాట్లాడే అవకాశం లేదని పార్టీ వర్గాలు వెల్లడించాయి.

ఇదీ చూడండి: ఆపరేషన్​ ఎన్​ఆర్​సీ: ఏకాకిలా భాజపా- ఎలా ముందుకు?