'బాలాకోట్​ సమాచారం అర్నబ్​కు లీక్​ చేసింది మోదీనే'

బాలాకోట్​ దాడి సమాచారాన్ని ప్రధానమంత్రి నరేంద్ర మోదీనే లీక్​ చేసి.. వైమానిక దళ సిబ్బంది ప్రాణాలను ప్రమాదంలోకి నెట్టారని కాంగ్రెస్​ అగ్రనేత రాహుల్​ గాంధీ ఆరోపించారు. అందుకే.. ఆ దాడి సమాచారం మూడు రోజుల ముందుగానే రిపబ్లిక్​ ఛానెల్​లో​ ప్రసారమైందని అన్నారు. ఇందులో నిజం లేదంటే వెంటనే.. ఈ అంశంపై దర్యాప్తు జరిపించాలని డిమాండ్​ చేశారు.

ప్రధానమంత్రి నరేంద్ర మోదీపై కాంగ్రెస్​ అగ్రనేత రాహుల్​ గాంధీ.. సంచలన ఆరోపణలు చేశారు. బాలాకోట్​లోని పాక్​ ఉగ్రవాద శిబిరాలపై 2019లో భారత వాయుసేన దాడి సమాచారాన్ని మోదీనే లీక్​ చేశారని రాహుల్​ అన్నారు. అందుకే అది అర్నబ్​ గోస్వామి ఎడిటర్​గా ఉన్న రిపబ్లిక్​ టీవీ ఛానెల్లో మూడు రోజుల ముందుగానేే వచ్చిందని పేర్కొన్నారు. తమిళనాడులో ఎన్నికల ప్రచారంలో పాల్గొన్న రాహుల్​​ ఈ వ్యాఖ్యలు చేశారు.

"బాలాకోట్​ దాడి గురించి మూడు రోజుల ముందే ఓ భారత జర్నలిస్టుకు తెలిసింది. అంటే.. భారత వాయుసేన సైనికుల ప్రాణాలను ప్రమాదంలోకి నెట్టినట్లే. ప్రధానమంత్రి, రక్షణ మంత్రి, జాతీయ భద్రతా సలహాదారు, వాయు సేన అధిపతి, హోం మంత్రి.. ఈ ఐదుగురికే బాలాకోట్​లో జరిగే దాడి గురించి తెలుసు. ప్రపంచంలో మిగతా ఎవ్వరికీ ఈ విషయం గురించి తెలియదు. మరి బాలాకోట్​లో దాడి జరుగుతుందని ముందే చెప్పిన ఆ జర్నలిస్టుపై దర్యాప్తు ఎందుకు జరపలేదు. ఈ ఐదుగురిలో ఒకరు ఆ సమాచారాన్ని సదరు జర్నలిస్టుకు చేరవేశారు. ప్రధానే ఆ పని చేశారు కాబట్టి, దీని గురించి విచారణ జరపలేదు. "

- రాహుల్​ గాంధీ, కాంగ్రెస్​ అగ్రనేత

ప్రధాని ఈ దాడి సమాచారాన్ని లీక్​ చేయలేదనేది నిజమే అయితే.. వెంటనే ఈ విషయంలో దర్యాప్తు జరిపించాలని రాహుల్​ డిమాండ్​ చేశారు. అయితే.. రాహుల్​ తన వ్యాఖ్యలపై ఆధారాలు మాత్రం వెల్లడించలేదు. ప్రధానమంత్రి కార్యాలయం కూడా దీనిపై స్పందించలేదు.

తనకు 56 అంగుళాల ఛాతి ఉందని చెప్పిన మోదీ.. భారత భూగంలోకి చైనా దళాలు ప్రవేశిస్తుంటే ఎందుకు మౌనంగా ఉన్నారని రాహుల్​ ఈ ఎన్నికల ప్రచారంలో నిలదీశారు. ప్రధానికి చైనా అనే పదాన్ని పలికే ధైర్యం కూడా లేదని విమర్శించారు.

ఇదీ చూడండి:పెట్రో ధరలపై మోదీకి రాహుల్​ పంచ్​