'లాక్​డౌన్​ లేకపోతే మన పరిస్థితి ఎలా ఉండేదో?'

కరోనాపై విషయంలో కేంద్రం ముందే అప్రమత్తమై, సరైన చర్యలు చేపట్టిందని స్పష్టంచేశారు ప్రధాని నరేంద్రమోదీ. లాక్​డౌన్​ను ప్రభుత్వం ఆలస్యంగా అమలు చేసిందని ఇటీవల కొందరు విమర్శించిన నేపథ్యంలో ఈమేరకు పరోక్షంగా స్పందించారు ప్రధాని.

కరోనా​పై పోరులో అభివృద్ధి చెందిన దేశాలతో పోల్చుకుంటే భారత్​ మెరుగైన స్థితిలో ఉందన్నారు ప్రధానమంత్రి నరేంద్ర మోదీ. ఇందుకు దేశంలో విధించిన లాక్​డౌన్​ ముఖ్య కారణమన్నారు. మంగళవారం జాతినుద్దేశించి ప్రసంగించారు మోదీ. విదేశాల నుంచి విమానాల రాకపోకల్ని నిలిపివేసి, లాక్​డౌన్ ప్రకటించే విషయంలో కేంద్రం ఆలస్యం చేసిందన్న విమర్శల మధ్య ఆయన కీలక వ్యాఖ్యలు చేశారు.

కేంద్రం ముందే అప్రమత్తమై.. భారత్​లో ఒక్క కేసు అయినా నమోదు కాకముందే స్క్రీనింగ్​ పరీక్షలు ప్రారంభించిందని చెప్పారు ప్రధాని. 550 కేసులున్నప్పుడే లాక్​డౌన్​ వంటి కీలక నిర్ణయం తీసుకున్నామని గుర్తుచేశారు.

దేశంలో 100 కేసులు నమోదయ్యే ముందే.. విదేశాల నుంచి వచ్చిన వారిని కచ్చితంగా 14రోజుల పాటు ఐసోలేషన్​లో ఉండాలని ఆదేశించినట్టు తెలిపారు. భారత్​ ముందే సరైన చర్యలు తీసుకోకపోతే దేశంలో పరిస్థితులు ఎలా ఉండేవోనని అన్నారు మోదీ.