కరోనా వీరులకు సైన్యం సలాం-మోదీ, షా ప్రశంసలు

కరోనాపై పోరాడుతున్న వైద్య సిబ్బందికి సంఘీభావంగా దేశవ్యాప్తంగా పలు ఆస్పత్రులపై పూల వర్షం కురిపించినందుకు సైన్యాన్ని ప్రశంసించారు ప్రధాని నరేంద్ర మోదీ, హోంమంత్రి అమిత్ షా. కరోనా వీరులకు త్రివిధదళాలు వందనం చేయడాన్ని కొనియాడారు.

ప్రాణాలను పణంగా పెట్టి కరోనాపై పోరులో ముందువరుసలో ఉన్న వైద్యుల సేవలకు సంఘీభావం తెలుపుతూ వారిపై పూల వర్షం కుర్పించే కార్యక్రమాన్ని దేశవ్యాప్తంగా చేపట్టాయి త్రివిధ దళాలు. యుద్ధ విమానాలతో ఆస్పత్రుల్లోని సిబ్బిందికి గౌరవ వందనం నిర్వహించాయి. ఈ సందర్భంగా సైన్యం చర్యలను స్వాగతించారు ప్రధాన మంత్రి నరేంద్ర మోదీ, హోంమంత్రి అమిత్ షా.

" కరోనాపై పోరులో ముందున్న సాహసవీరులకు వందనం చేసి సైన్యం గొప్ప పని చేసింది " అని ట్వీట్ చేశారు మోదీ. ఇందుకు సంబంధించిన వీడియోను జత చేశారు.

అమిత్ షా స్పందన..

వైద్యులు, పోలీసులు, పారామిలిటరీ దళాలు, పారశుద్ధ్య కార్మికులు కరోనాపై సాహసోపేతంగా పోరాడుతున్నారని ప్రశంసించారు అమిత్ షా. త్రివిధ దళాలు నేడు వారిపట్ల చూపిన గౌరవం మనస్సును కదిలించేలా ఉందని ట్వీట్ చేశారు.

" కరోనాపై పోరాడుతున్న యోధులకు దేశమంతా సలాం చేస్తోంది. మోదీ ప్రభుత్వంతో పాటు ప్రజలంతా మీకు మద్దతుగా ఉన్నారు. కరోనా రహితంగా దేశాన్ని మార్చి ప్రపంచానికి ఆదర్శంగా నిలవాలి. ఆరోగ్య, దృఢమైన భారత్​ను నిర్మించాలి. జైహింద్​"

-అమిత్ షా ట్వీట్​.