'ఫొనిపై మోదీతో దీదీ ఫోన్​లో మాట్లాడలేదు'

బంగాల్​ ముఖ్యమంత్రితో ఫొని తుపాను ప్రభావంపై ప్రధాని చర్చించలేదని తృణమూల్​ కాంగ్రెస్ చేసిన ఆరోపణలపై ఓ ఉన్నతాధికారి స్పందించారు. నిజానికి మోదీ రెండు సార్లు మమతతో మాట్లాడడానికి ప్రయత్నించారని... కానీ ముఖ్యమంత్రి స్పందించలేదని అన్నారు. అనంతరం గవర్నర్​తో మోదీ చర్చించారని తెలిపారు.

ఫొని తుపాను ప్రభావంపై బంగాల్​ ముఖ్యమంత్రితో చర్చించడానికి ప్రధానమంత్రి నరేంద్ర మోదీ ప్రయత్నించారని... కానీ మమతా బెనర్జీ స్పందించలేదని ఓ కేంద్ర ప్రభుత్వ ఉన్నతాధికారి వెల్లడించారు. ముఖ్యమంత్రితో సంభాషణ కుదరకపోవడం వల్ల ఆ రాష్ట్ర గవర్నర్​ కేసరి నాథ్​ త్రిపాఠితో మోదీ చర్చలు జరిపారని స్పష్టం చేశారు.

"మమతతో ఫోనులో మాట్లాడటానికి ప్రధాని రెండుసార్లు ప్రయత్నించారు. కానీ ఆ రెండు సార్లూ ముఖ్యమంత్రి తిరిగి సంప్రదిస్తారనే సమాధానమొచ్చింది. ఒకసారైతే ముఖ్యమంత్రి పర్యటనలో ఉన్నారని అన్నారు."
- ఉన్నతాధికారి.

ఫొని తుపాను ప్రభావంపై మమతను మోదీ సంప్రదించలేదని తృణమూల్​ కాంగ్రెస్​ ఆరోపించిన అనంతరం ఉన్నతాధికారి ఈ వ్యాఖ్యలు చేశారు.

తుపాను నేపథ్యంలో కేంద్ర ప్రభుత్వం సహకారంపై బంగాల్​ గవర్నర్​తో చర్చించినట్టు ప్రధాని శుక్రవారం ట్వీట్​ చేశారు.

ఇదీ చూడండి: ఐదో విడత సార్వత్రిక పోలింగ్​​కు సర్వం సిద్ధం