చంద్రయాన్​ కోసం కృష్ణుడికి 56 వంటకాలతో నైవేద్యం

లక్షలాది మంది ఒక్కచోట చేరి.. చిన్ని కృష్ణుడికి కడుపు నిండా భోజనం పెట్టారు. దేశం కోసం ఓ గొప్ప కోరిక కోరారు. చంద్రయాన్​-3 విఘ్నాలు లేకుండా జాబిల్లిపైకి వెళ్లేలా చూడాలని ప్రార్థించారు.

ఉత్తర్​ప్రదేశ్​ మథురలో ఏటా జరిగే ఛప్పన్​ భోగ్​ పండుగను ఈసారి ఇస్రోకు అంకితమిచ్చి భరతమాతపై ప్రేమను చాటారు గిరిరాజ్​ సేవా సమితి సభ్యులు.

ప్రాంగణ అలంకరణలో భాగంగా చంద్రయాన్ రాకెట్​ ప్రత్యేక నమూనాను ఏర్పాటు చేశారు. లక్షల్లో హాజరైన భక్తులు భవిష్యత్​లో ప్రయోగించబోయే చంద్రయాన్​-3 విజయవంతంగా చంద్రుడ్ని చేరేలా చూడాలని ఆ చిన్ని కృష్ణుడ్ని వేడుకున్నారు. సంప్రదాయం, శాస్త్రీయత ఒకే చోట ఉట్టిపడ్డ ఈ కార్యక్రమానికి ఇస్రో శాస్త్రవేత్త కె. సిద్ధార్థ్​ కుటుంబసమేతంగా విచ్చేశారు.

శ్రీకృష్ణుడికి సమర్పించే ప్రత్యేక నైవేద్యాన్ని ఛప్పన్​ భోగ్​ అంటారు. ద్వాపర యుగంలో కొంటె కృష్ణుడ్ని ప్రసన్నం చేసుకునేందుకు అనేక ఆహార పదార్థాలు సమర్పించి, తమ కోరికలను తీర్చమని అడిగేవారట. ఆహార ప్రియుడైన కన్నయ్య అవి కడుపారా తినేసి వారి మనోవాంఛలను సిద్ధించేవాడట. అందుకే, అనాథిగా ఇలా భోగ్​ సమర్పిస్తారు భక్తులు.

ఈసారి 56 రకాల వంటకాలు నల్లనయ్యకు సమర్పించారు. వివిధ ప్రాంతాల నుంచి సేకరించిన నెయ్యితో 21 వేల కిలోల మహాప్రసాదాన్ని తయారు చేశారు.

ఇదీ చూడండి: ఓనమ్​ ప్రత్యేకం: ఈదకుండా కొలను దాటినవారే విజేత