'ఇంటి నుంచి బయటకు వస్తే ఇక అంతే'

దేశంలో అనేకమంది ప్రజలు లాక్​డౌన్​ను తీవ్రంగా పరిగణించడం లేదని ప్రధాని నరేంద్ర మోదీ ఉద్ఘాటించారు. ఈ నిబంధనను ప్రజలు ఉల్లంఘిస్తే వారిపై కఠినమైన చర్యలు తీసుకోమని రాష్ట్ర ప్రభుత్వాలకు ఆదేశాలు జారీ చేశారు.

లాక్​డౌన్​ను అనేకమంది ప్రజలు తీవ్రంగా పరిగణలోకి తీసుకోవట్లేదన్నారు ప్రధాని నరేంద్ర మోదీ. అలక్ష్యం తగదని, అందరూ ఆరోగ్య సూచనలు పాటించాలని సోమవారం ట్విటర్‌ వేదికగా ప్రజలకు సూచించారు. ఈ నిబంధనను ప్రజలందరూ ఆచరణాత్మకంలో పెట్టేలా రాష్ట్రాలు చర్యలు తీసుకోవాలని విజ్ఞప్తి చేశారు.

"లాక్​డౌన్​ను అనేక మంది ప్రజలు తీవ్రంగా పరిగణించడం లేదు. మిమ్మల్ని మీరు రక్షించుకోండి. మీ కుటుంబాన్ని కాపాడుకోండి. నియమాలను పాటించండి. ఇటలీ, ఇరాన్, స్పెయిన్‌ అనుభవాలను మరచిపోవద్దు. మూడు దేశాల్లో జరుగుతున్న నష్టాన్ని చూసి కళ్లు తెరవండి. దేశంలో ప్రతి ఒక్క పౌరుడూ తన బాధ్యతను గుర్తుపెట్టుకోవాలి. ప్రజలు లాక్​డౌన్​ పాటించేలా రాష్ట్రాలు చర్యలు తీసుకోవాలని కోరుతున్నా."

- నరేంద్ర మోదీ, ప్రధాని

ఇటీవల కేంద్ర, రాష్ట్ర ప్రభుత్వాలు దేశంలోని కరోనా ప్రభావిత ప్రాంతాలైన 80 జిల్లాలను పూర్తిగా మూసివేశాయి. యూపీ, మహారాష్ట్ర, పంజాబ్​, కర్ణాటక, తమిళనాడు, కేరళలోని అధిక జిల్లాలు మూతబడ్డాయి.

ఇంట్లో నుంచి వస్తే అంతే

మోదీ ట్వీట్​ చేసిన కొద్ది సేపటికే.. ప్రజలు లాక్​డౌన్​ పాటించేలా కఠినమైన చర్యలు తీసుకోవాలని రాష్ట్రప్రభుత్వాలకు సూచించింది కేంద్రం. ఎవరైనా నిబంధనను ఉల్లంఘిస్తే వారిపై చట్టపరమైన చర్యలు తీసుకోమని ఆదేశాలు జారీ చేసింది.

దేశ రాజధాని దిల్లీలో ఈ రోజు ఉదయం 6 గంటల నుంచి మార్చి 23 వరకు లాక్​డౌన్​ చేస్తున్నట్లు ప్రకటించింది కేజ్రీవాల్​ ప్రభుత్వం. కానీ ఆరోగ్య, ఆహార, నీరు, విద్యుత్​ సరఫరా వంటి అత్యవసర సేవలు కొనసాగుతాయని వెల్లడించింది. అత్యవసర ప్రజా రవాణా కోసం 25శాతం డీటీసీ బస్సు సేవలను నడుపుతున్నట్లు తెలిపింది.

ఇదీ చూడండి : కరోనాపై భారత్​ సమరం- లాక్​డౌన్​లో పలు రాష్ట్రాలు