కర్కశం: భార్య, ముగ్గురు పిల్లల గొంతుకోసి హత్య

దిల్లీలో దారుణం జరిగింది. తన భార్య ముగ్గురు పిల్లలను గొంతుకోసి హత్యచేశాడు ఓ కర్కశుడు​. మృతుల్లో రెండు నెలల పసికందు ఉంది. శుక్రవారం అర్ధరాత్రి వారు నిద్రిస్తున్న సమయంలో ఈ దురాఘాతానికి పాల్పడ్డాడు నిందితుడు.

దేశ రాజధాని దిల్లీలోని మహరౌలీలో దారుణ ఘటన జరిగింది. ఒంటి నిండా కర్కశత్వంతో నిండిన ఓ వ్యక్తి... కట్టుకున్న భార్యను, రెండు నెలల చిన్నారి సహా ముగ్గురు కన్నపిల్లలను కడతేర్చాడు. కనికరం లేకుండా వారి గొంతు కోసి హత్య చేశాడు. శుక్రవారం అర్ధరాత్రి భార్య, పిల్లలు నిద్రిస్తున్న సమయంలో ఈ ఘాతుకానికి పాల్పడ్డాడు. రెండు నెలల పసికందు కూతురిని చూసైనా జాలి కలగలేదు ఆ కఠినాత్ముడికి.

ముగ్గురు పిల్లల్లో బాలుడికి ఐదేళ్లు కాగా, ఏడేళ్ల బాలికతో పాటు రెండు నెలల శిశువు ఉంది.

ఈ దారుణానికి ఒడిగట్టిన నిందితుడు ఉపేందర్ శుక్లా... ప్రైవేటు ట్యూటర్​గా పనిచేస్తున్నాడని పోలీసులు తెలిపారు. అతడిని అదుపులోకి తీసుకుని విచారిస్తున్నారు. కుటుంబ సభ్యులను శుక్లా ఎందుకు హత్యచేశాడో ఇంకా తెలియలేదని అధికారులు చెప్పారు. అతడు మానసిక ఒత్తిడి సమస్యతో బాధపడుతున్నట్లు పేర్కొన్నారు.

ఘటన జరిగిన సమయంలో ఇంట్లో శుక్లా అత్త కూడా ఉంది. శనివారం ఉదయం గది తలుపులు ఎంతకొట్టినా శుక్లా తెరవలేదు. పొరుగు వారి సాయంతో తలుపులు పగులకొట్టగా... ముగ్గురి శవాల పక్కన శుక్లా కూర్చొని ఉండటం చూసి స్థానికులు నిర్ఘాంతపోయారు. వెంటనే పోలీసులకు సమాచారం ఇచ్చారు.

తానే హత్యకు పాల్పడినట్లు శుక్లా పేర్కొన్న లేఖను ఘటనా స్థలంలో గుర్తించారు అధికారులు. నిందితుడు ఉపయోగించిన కత్తిని స్వాధీనం చేసుకున్నారు.

ఇదీ చూడండి: టిక్​టాక్​ కోసం ప్రాణం తీసుకున్నాడు