భార్యను చంపి.. అత్తను హతమార్చి.. ఆత్మహత్య

బెంగళూరులో భార్యను చంపి.. కోల్​కతాలో అత్తను హతమార్చాడు ఓ ఉన్మాది. ఆపై తానూ ఆత్మహత్య చేసుకున్నాడు. అల్లుడి నుంచి తప్పించుకున్న మామ పోలీసులకు సమాచారమిచ్చాడు. దీంతో అటు కర్ణాటక పోలీసులు, ఇటు బంగాల్​ పోలీసులు దర్యాప్తు చేపట్టారు.

కర్ణాటకలో భార్యను హత్య చేసి.. బంగాల్​కు వచ్చి అత్తను చంపిన ఓ ప్రైవేటు ఉద్యోగి.. తానూ ఆత్మహత్య చేసుకున్నాడు.

భార్య , తనయుడితో కలిసి బెంగళూరులో వైట్​ఫీల్డ్​ అపార్ట్​మెంట్​లో ఉంటున్న 42 ఏళ్ల అమిత్​ అగర్వాల్ ఓ ప్రైవేటు ఉద్యోగి. సోమవారం సాయంత్రం కోల్​కతా కంకుర్​గచిలోని అత్తారింటికి చేరుకున్నాడు. అత్త లలితా ధన్​ధనియాతో చాలాసేపు వాదించాడు. ఆవేశంలో తుపాకీ తీసి అత్తను అత్యంత సమీపం నుంచే కాల్చి చంపాడు.

ఆ సమయంలో ఇంట్లోనే ఉన్న మామ సుభాష్​ ధన్​ధనియా అల్లుడి ప్రవర్తనకు వణికిపోయాడు. తననూ చంపేస్తాడనే భయంతో ​ అల్లుడున్న గదికి గొళ్లెం పెట్టి, బయటికి పరుగులు తీశాడు. ఇరుగు పొరుగు వారి సాయంతో పోలీసులకు ఫోన్​ చేశాడు.

ఘటనా స్థలానికి చేరుకున్న పోలీసులు రక్తపు మడుగుల్లో పడి ఉన్న రెండు మృతదేహాలను చూసి నిర్ఘాంతపోయారు. అత్తను చంపిన అమిత్​.. ఆ తర్వాత తానూ కాల్చుకుని ఆత్మహత్య చేసుకున్నాడని పోలీసులు స్పష్టం చేశారు. సూసైడ్​ నోట్​లో భార్యను బెంగళూరులో చంపేసిన తర్వాతే.. అత్తను హత్య చేసేందుకు కోల్​కతా వచ్చానని రాసిపెట్టాడు అమిత్​.

దీంతో బెంగళూరు పోలీసులకు సమాచారమిచ్చారు కోల్​కతా పోలీసులు. హుటాహుటిన అమిత్​ నివాసానికి చేరుకున్న బెంగళూరు పోలీసులు భార్య మృతదేహాన్ని స్వాధీనం చేసుకుని..కేసు నమోదు చేసుకున్నారు.

ఇదీ చదవండి:ఏం ఐడియా గురూ: అమ్ముడవని అరటిపళ్లను ఎండబెట్టి..