చిట్టితోటలో 400 రకాల బోన్సాయ్ చెట్లు

కేరళలోని తళిపరంబకు చెందిన ఓ వ్యక్తి వివిధ రకాల బొన్సాయ్​ చెట్లను పెంచుతున్నాడు. ఒకటి, రెండు కాదు ఏకంగా 400 రకాలకు పైగా బోన్సాయ్​ చెట్లు అతని ఇంట్లో దర్శనిమిస్తాయి. మరి ఈ బోన్సాయ్​పైన ఆసక్తి అతనికి ఏలా ఏర్పడింది? అతని మాటల్లోనే తెలుసుకుందాం.

కేరళ, కన్నూర్ జిల్లాలోని తళిపరంబలో ఉన్న ఈ ఇల్లు.. చిట్టిపొట్టి చెట్లతో నిండిపోయి కనిపిస్తుంది. ఈ ఇల్లు సులేమాన్ నివాసమే కాదు...400రకాలకు పైగా బొన్సాయ్ చెట్లకు నిలయం. ఎక్కడచూసినా బొన్సాయ్‌ చెట్లతో ఉన్న చిన్నకుండీలే దర్శనమిస్తాయి. మేడమీద, ఇంటిముందు ఖాళీస్థలమంతా నిండిపోయిన వాటికి తన మనసులోనూ ప్రత్యేక స్థానమిచ్చాడు సులేమాన్.

బొన్సాయ్ అంటే జపనీస్‌ భాషలో చిన్నకుండీలో పెరిగిన చెట్టు అని అర్థం. పూర్తిగా పెరిగిన వృక్షాల్లాగే అచ్చుగుద్దినట్లు చిన్నపరిమాణంలో ఉంటాయి. పరిసరాలకు అదనపు అందం తెచ్చిపెట్టే ఈ బొన్సాయ్‌లు.. ఎవ్వరి దృష్టినైనా ఇట్టే ఆకర్షిస్తాయి. సూర్యరశ్మి, నీరు, ఎరువుల సరఫరాను నియంత్రించి, కాండాన్ని మెలిపెట్టి, తిప్పడం ద్వారా సాధారణ చెట్టు ఎదుగుదలనే నియంత్రించి బొన్సాయ్‌లుగా చేస్తారన్న అభిప్రాయం చాలామందిలో ఉంది.

అయితే అది నిజం కాదు. పెద్ద చెట్టు లక్షణాలే బొన్సాయ్‌లోనూ పూర్తిస్థాయిలో ఉంటాయి. సులేమాన్ చిట్టితోటలో.. పూల మొక్కలూ, చిన్నచిన్న పండ్లు కాసే సపోటా చెట్లు, చింత, మర్రిచెట్లు సహా ఎన్నో బుజ్జి వృక్షాలు కుండీల్లో దర్శనమిస్తాయి. 400లకు పైగా చిట్టిచెట్లను సులేమాన్ పెంచుతున్నాడు.

65, 25, 15 ఏళ్ల వయసున్న బొన్సాయ్ మర్రిచెట్లు, వీపింగ్ ఫిగ్‌గా సుపరిచితమైన ఫికస్ బెంజామినా చెట్లు, పదేళ్ల వయసున్న సపోటా చెట్టు, 25 ఏళ్ల చింతచెట్టు సులేమాన్‌ ఇంట ప్రధాన ఆకర్షణగా నిలుస్తున్నాయి. వీటన్నింటిలో ఐదేళ్ల వయసున్న మర్రిచెట్టు ధర తక్కువ. దీని ధర 2వేల రూపాయలని చెప్తున్నాడు సులేమాన్.

"నేనోసారి కోజికోడ్‌లో ఒక పూల ప్రదర్శనకు వెళ్లాను. చిన్నచిన్న కుండీల్లో ఉన్న చిట్టిచెట్లను అక్కడ చూశాను. అవి నన్ను బాగా ఆకర్షించాయి. ఇష్టం కొద్దీ వాటి గురించి తెలుసుకోవడం మొదలుపెట్టాను."

-సులేమాన్, బొన్సాయ్ రైతు

25 ఏళ్లుగా ఇదే రంగంలో కొనసాగుతున్నాడు సులేమాన్. గత ఏడేళ్లలో వరుసగా కన్నూర్ అగ్రి, హార్టికల్చర్ సొసైటీ నుంచి ప్లాంట్ ఆఫ్ ది ఇయర్ అవార్డును గెలుచున్నాడు. అంతేకాదు ఉత్తమ బొన్సాయ్ రైతు పురస్కారం కూడా అందుకున్నాడు. వడకరాకు చెందిన ప్రవీణ్ కుమార్, సులేమాన్ కలిసి బొన్సాయ్ చెట్లు పెంచుతున్నారు.

"బొన్సాయ్ వల్లే ప్రవీణ్ కుమార్‌తో నాకు స్నేహం ఏర్పడింది. ఇద్దరం కలిసి బొన్సాయ్ చెట్ల పెంపకం చేపట్టాలని నిశ్చయించుకున్నాం. 400కు పైగా రకాలు అభివృద్ధి చేశాం. వాటిలో 65 ఏళ్ల ఫికస్ బెంజామినా అన్నింటికంటే పెద్ద చెట్టు. గతంలో కాసరగోడ్ వద్ద జరిగిన ఓ ప్రదర్శనలో ఈ బొన్సాయ్‌ చెట్టుకు లక్ష రూపాయల ఆఫర్‌ వచ్చింది. ఏదేమైనా బొన్సాయ్ చెట్లను అమ్మకూడదని ప్రవీణ్ నేను నిర్ణయించుకున్నాం."

-సులేమాన్, బొన్సాయ్ రైతు

బొన్సాయ్‌ చెట్ల పెంపకంపై ఆసక్తి ఉన్నవారు చింత, ఉసిరి లాంటి చిన్నచిన్న ఆకులుండే చెట్లు, వివిధ రకాల మర్రిచెట్లతో ప్రారంభించవచ్చు. వాటిని పెంచడం పెద్ద కష్టమేమీ కాదు. పెద్ద కుండీలో చిన్న చెట్టును రెండేళ్లపాటు పెంచిన తర్వాత..కొమ్మలు, వేర్లు కత్తిరించి, చిన్న కుండీలోకి మార్చాలి. చిన్నకుండీల్లోకి చెట్లను మార్చేందుకు జనవరి, ఫిబ్రవరి నెలలు అనుకూలంగా ఉంటాయి. మట్టి, పేడఎరువు, ఇసుకను సమాన మోతాదుల్లో తీసుకోవాలి. మొక్క ఒక రోజులోనో, నెలలోనో బొన్సాయ్ చెట్టుగా మారిపోదు. సమయం, ఓపికతోపాటు బొన్సాయ్ గార్డెనింగ్ కళలో నైపుణ్యాలుంటే ఈ చెట్లతో సుందరమైన తోటను తీర్చిదిద్దుకోవచ్చు.

ఇదీ చూడండి :ఆనంద్​ ఆఫ్​ కశ్మీర్​గా పుల్వామా- పాల ఉత్పత్తిలో భేష్​​