బ్యాంకులకు 9 వేల కోట్ల రూపాయల రుణాలు ఎగవేసి విదేశాలకు పరారైన విజయ్మాల్యాకు లండన్ హైకోర్టులో చుక్కెదురైంది. తనను భారత్కు తిరిగి పంపించేందుకు అనుమతిస్తూ బ్రిటన్ హోంశాఖ జారీ చేసిన ఆదేశాలను రద్దు చేయాలని మాల్యా దాఖలు చేసిన అప్పీలును కోర్టు తిరస్కరించింది.
మాల్యా కేసుల విచారణలో పాల్గొనేందుకు ఆయన్ని భారతదేశానికి పంపించాలని గత డిసెంబర్లో వెస్ట్మినిస్టర్ మేజిస్ట్రేట్ కోర్టు తీర్పునిచ్చింది. ఫలితంగా బ్రిటన్ హోంశాఖ మాల్యాను భారత్కు పంపించేందుకు ఆదేశాలు ఇచ్చింది.
ఈ ఆదేశాలపై, తనకు అప్పీలు చేయడానికి అనుమతి ఇవ్వాలని విజయ్మాల్యా లండన్ హైకోర్టును ఆశ్రయించారు. మాల్యా లిఖిత పూర్వకంగా చేసుకున్న ఈ అభ్యర్థనను కోర్టు తిరస్కరించింది. అయితే ఇదే న్యాయస్థానంలో మాల్యా ఐదు రోజుల్లోగా మౌఖికంగా తన వాదన వినిపించి అప్పీలుకు అనుమతి ఇవ్వాలని కోరే అవకాశాలు ఉన్నాయి. 2017 ఏప్రిల్ నుంచి మాల్యా బ్రిటన్లో బెయిల్పై ఉన్నారు.
లిక్కర్ వ్యాపారి, మాజీ కింగ్ఫిషర్ ఎయిర్లైన్స్ అధిపతి, 63 ఏళ్ల విజయ్ మాల్యాపై ఆర్థిక మోసం, అక్రమ నగదు లావాదేవీలు, విదేశీ మారక ద్రవ్య నిర్వహణ చట్టం ఉల్లంఘన వంటి పలు అభియోగాలు ఉన్నాయి.
ఇదీ చూడండి: సజ్జన్ పిటిషన్పై సీబీఐ స్పందన కోరిన సుప్రీం