కశ్మీర్లో యువత పెడదారులు తొక్కటం ఒకప్పటి మాట. ఇప్పుడు పరిస్థితులు మారుతున్నాయి. అన్ని అవరోధాలను అధిగమించి తమ సత్తా చాటుతూ రాష్ట్రానికి, దేశానికి గర్వకారణంగా మారుతున్నారు. అలాంటి కోవకు చెందిన వాడే దక్షిణ కశ్మీర్లోని పుల్వామా జిల్లాకు చెందిన 20ఏళ్ల యువ రచయిత. తనలోని ప్రతిభతో ఇండియా బుక్ ఆఫ్ రికార్డ్స్లో చోటు సంపాదించుకున్నాడు.
జిల్లాలోని కద్లాబల్ ప్రాంతానికి చెందిన సరాఫ్ అలీ భట్.. ఇప్పటి వరకు రెండు పుస్తకాలు రాశాడు. తన తొలి పుస్తకం 'ఏ స్మైల్ వర్త్ ఏ బిలియన్ పోయమ్స్' 2018లో పబ్లీష్ అయింది. రెండోది 'ట్రిగ్గర్డ్ సోర్స్' పుస్తకం 2019లో పబ్లీష్ అయింది. ఈ రెండు పుస్తకాలకు మంచి ఆదరణ లభించింది. అంతర్జాతీయంగా సరాఫ్కు మంచి పేరు వచ్చేందుకు దోహదపడింది.
"ట్రిగ్గర్డ్ సోర్స్కు 2019లో అంతర్జాతీయ స్థాయిలో రీడర్స్ ఛాయిస్ అవార్డ్ లభించింది. ప్రశంసాపత్రంతో పాటు 50 డాలర్ల నగదు బహుమతి పొందాను. ఆ తర్వాత ఇండియా బుక్ ఆఫ్ రికార్డ్స్లో చోటు లభించింది. కశ్మీరీ యువతలోని ప్రతిభను బయటపెట్టేందుకు సరైన వేదికలు లేవు. కానీ, మా ఆత్మస్థైర్యాన్ని కోల్పోలేదు. ప్రజలు తమ కలలను వదులుకోవాలని నేను కోరుకోను. రచన అనేది పూర్తిస్థాయి వృత్తిగా ఉండే కాలంలో కశ్మీర్ లేదు. వారి కళాత్మకతను వృత్తిగా కాకుండా ఒక అభిరుచిగా మార్చుకోవాలని సూచిస్తున్నా. నాకు పాఠకులు, స్నేహితులు, కుటుంబ సభ్యుల నుంచి మంచి ప్రేరణ లభించిన తర్వాత రచనను కొనసాగించాను. అందరి సహకారంతో రచయితల సంఘంలో చేరగలిగాను."