దిల్లీ నిజాముద్దీన్లో తబ్లీగీ జమాత్ ప్రార్థనల్లో పాల్గొన్న వారి గురించి గ్రామాధికారికి సమాచారం అందించాడనే కోపంతో ఓ వ్యక్తిపై కొందరు దుండగలు దాడికి పాల్పడిన ఘటన మహారాష్ట్ర సోలాపుర్లో జరిగింది. ఈ వ్యవహారంపై పోలీసులు కేసు నమోదు చేసి, నిందితుల కోసం గాలిస్తున్నారు.
వైరాగ్ పోలీసులు కథనం ప్రకారం... మర్కజ్ నుంచి తిరిగి స్వస్థలానికి వచ్చిన ఏడుగురు వ్యక్తుల గురించి ఓ పెద్దాయన 'గ్రామసేవక్'కు సమాచారం అందించాడు. వారందరికీ కచ్చితంగా కరోనా పరీక్షలు నిర్వహించాలని కోరాడు. తమ విషయాన్ని బయట పెట్టాడనే కోపంతో ఆ దుండగులు అంతా కలిసి పెద్దాయనపై దాడి చేశారు.
మహిళను చంపేసిన జవాన్
ఉత్తర్ప్రదేశ్ అలీపుర్లో దారుణం జరిగింది. ఇటీవలే కోల్కతా నుంచి స్వగ్రామానికి వచ్చిన ఓ ఆర్మీ జవాన్... స్థానిక మహిళను తుపాకీతో కాల్చిచంపేశాడు.
కరోనా వైరస్ ప్రబలతున్న నేపథ్యంలో ఇతర ప్రాంతాల నుంచి స్వస్థలాలకు వచ్చిన వ్యక్తుల జాబితా రూపొందించాలని అలీపుర్ అధికార యంత్రాంగం నిర్ణయించింది. ఈ బాధ్యతను వినయ్ యాదవ్ అనే వ్యక్తికి అప్పగించింది. వినయ్... ఇటీవలే కోల్కతా నుంచి గ్రామానికి వచ్చిన ఆర్మీ జవాన్ శైలేంద్ర సహా అతడి కుటుంబ సభ్యుల పేర్లను జాబితాలో చేర్చాడు.
తమ పేర్లు జాబితాలో చేర్చాడనే కోపంతో శైలేంద్ర, మరో ముగ్గురు... వినయ్ యాదవ్ ఇంటిలోకి చొరబడి, దాడి చేశారు. వినయ్ను రక్షించడానికి అతడి సోదరుడు దినేశ్, వదిన సంధ్య ప్రయత్నించారు. కోపంతో ఊగిపోయిన శైలేంద్ర తుపాకీతో కాల్పులు జరిపాడు. తీవ్రంగా గాయపడిన సంధ్య అక్కడికక్కడే ప్రాణాలు కోల్పోయింది. పోలీసులు నిందితుడిపై ఎఫ్ఐఆర్ నమోదు చేసి, అదుపులోకి తీసుకున్నారు.
ఇదీ చూడండి:సర్కార్ 'లిక్కర్ పాసుల' నిర్ణయంపై హైకోర్టు స్టే
