మహారాష్ట్రలో ఒక్కరోజే కరోనాతో 198 మంది మృతి

దేశంలో కరోనా వ్యాప్తి తీవ్రంగా ఉన్న మహారాష్ట్రలో ఇవాళ 6 వేలకుపైగా కేసులు నమోదయ్యాయి. మరో 198 మంది మరణించారు. ఇతర రాష్ట్రాల్లోనూ బాధితులు భారీగా పెరిగిపోతున్నారు.

మహారాష్ట్రలో కరోనా విజృంభిస్తోంది. ఇవాళ కొత్తగా 6 వేల 603 మందికి వైరస్​ సోకింది. మరో 198 మంది బలయ్యారు. రాష్ట్రంలో మొత్తం కేసులు 2 లక్షల 23 వేలు దాటాయి. మరణాల సంఖ్య 10 వేలకు చేరువైంది.

రాష్ట్రంలో కరోనా కేసులు భారీగా పెరుగుతున్నా.. హోటళ్లు తెరుస్తూ నిర్ణయం తీసుకుంది ప్రభుత్వం. రానున్న రోజుల్లో పరిస్థితులకు అనుగుణంగా.. రెస్టారెంట్లు, జిమ్​లు కూడా ప్రారంభించే దిశగా ప్రణాళికలు రచిస్తున్నట్లు తెలిపారు ఆరోగ్య మంత్రి రాజేశ్​ తోపే.

• మధ్యప్రదేశ్​లో మరో 409 మంది వైరస్​ బారినపడ్డారు. మరో ఏడుగురు చనిపోయారు.
• పంజాబ్​లో ఇవాళ 158 కేసులు నమోదయ్యాయి. మరణాల సంఖ్య 178గా ఉంది.
• గుజరాత్​లో ఒక్కరోజు 700 మందికిపైగా కరోనా సోకింది.
• బంగాల్​లో 986 కొత్త కేసులు నమోదయ్యాయి. ఒక్కరోజులో 23 మరణాలు సంభవించాయి.