మహారాష్ట్ర ముఖ్యమంత్రిగా బాధ్యతలు చేపట్టిన ఉద్ధవ్ ఠాక్రే ఆచితూచి అడుగులు వేస్తున్నారు. మోదీ సర్కార్ ప్రతిష్ఠాత్మకంగా చేపట్టిన ముంబయి-అహ్మదాబాద్ బుల్లెట్ రైలు ప్రాజెక్ట్కు బ్రేకులు వేశారు. బుల్లెట్ రైలు సహా గత ప్రభుత్వం మొదలు పెట్టిన ప్రాజెక్ట్లను సమీక్షించాలని ఆదేశాలు ఇచ్చారు.
ప్రాజెక్ట్ కోసం పెద్దఎత్తున భూ సేకరణ చేయాల్సి ఉండటం వల్ల.. బుల్లెట్ రైలు ప్రాజెక్టుపై రైతులు, గిరిజనుల నుంచి తీవ్రమైన వ్యతిరేకత వ్యక్తమవుతోంది. ఇప్పటికే మెట్రో రైలు షెడ్ నిర్మాణం కోసం... ముంబయి శివారులోని గోరేగావ్ ఆరే ప్రాంతంలో వేలాది చెట్ల నరికివేతపై పెద్దఎత్తున ఆందోళనలు జరిగాయి. హైకోర్టు కూడా అనుకూలంగా తీర్పు ఇవ్వటం వల్ల గత ప్రభుత్వం ప్రజా వ్యతిరేకతను పట్టించుకోలేదు.
అయితే ఇటీవల సీఎం పగ్గాలు చేపట్టిన ఉద్ధవ్ ఠాక్రే మెట్రో రైలు షెడ్ నిర్మాణం ప్రాజెక్టును నిలిపివేస్తున్నట్లు ప్రకటించారు. బుల్లెట్ రైలు ప్రాజెక్టుపైనా సమీక్ష జరిపి ఓ నిర్ణయం తీసుకునే అవకాశం ఉన్నట్లు శివసేన వర్గాలు పేర్కొన్నాయి.